Ығбал тилеп әўел бастан,
Қайырхомлық болып жастан,
Күндей күлип, кеўил қосқан,
Ўәдесин берген, қайдасаң?

Өмир гүлим, кеўил тоғым,
Жүрегиме салған шоғым,
Көрмей сөнбес жанған отым,
Қәдирданым, сен қайдасаң?

Сен ушын гездим дүньяны,
Зийўардың болмай паяны,
Тахат етпей шыбын жаны,
Жүректиң гилти қайдасаң?

Шығалмадым шуғыл сөзден,
Ғайып болып кеттиң көзден,
Душпан қуўды сизди бизден,
Кеўлимниң хошы қайдасаң?

Гириян болып ғәрип гезген,
Орыс, қазақ қалмай бизден,
Елге келип хабар сезген,
Интизарым, сен қайдасаң?

Ҳәр мухамға атың дөнип,
Лаўлап жанған отың сенип,
Қара жерге жемтик болып,
Дийдарсыз кеткен қайдасаң?

Аллаға сыйынып мәзи,
Шәриятты бузып қазы,
Көриспесек бол разы,
Рухы мазарым қайдасаң?

Iǵbal tilep áwel bastan,
Qayırxomlıq bolıp jastan,
Kúndey kúlip, kewil qosqan,
Wádesin bergen, qaydasań?

Ómir gúlim, kewil toǵım,
Júregime salǵan shoǵım,
Kórmey sónbes janǵan otım,
Qádirdanım, sen qaydasań?

Sen ushın gezdim dúnyanı,
Ziywardıń bolmay payanı,
Taxat etpey shıbın janı,
Júrektiń gilti qaydasań?

Shıǵalmadım shuǵıl sózden,
Ǵayıp bolıp kettiń kózden,
Dushpan quwdı sizdi bizden,
Kewlimniń xoshı qaydasań?

Giriyan bolıp ǵárip gezgen,
Orıs, qazaq qalmay bizden,
Elge kelip xabar sezgen,
Íntizarım, sen qaydasań?

Hár muxamǵa atıń dónip,
Lawlap janǵan otıń senip,
Qara jerge jemtik bolıp,
Diydarsız ketken qaydasań?

Allaǵa sıyınıp mázi,
Sháriyattı buzıp qazı,
Kórispesek bol razı,
Ruxı mazarım qaydasań?