Бу дүньяда шады-хоррам болмадым,
Қалдың йүрәгимдә, әрманий дүнья,
Айшыў-иширәт, заўқы-сапа сүрмәдим,
Қалдың йүрәгимдә, әрманий дүнья.

Кийерге сарпай йоқ, минәргә ат йоқ,
Аспанға ушарға мендә қанат йоқ,
Шырмалып ятарға бир пәрийзат йоқ,
Йүрәк баўрым тилдиң, әрманий дүнья.

Мал-дүньяны қуўсам, ол мени күтмәс,
Биринә йетсә де, биринә йетмәс,
Бул дүньяның иси өлгәншә питмәс,
Қалдың йүрәгимдә, әрманий дүнья,

Бир нешәни алтын таққа миндирип,
Бирнешәниң жанған отын сөндирип,
Ләйли киби ышқы отына күйдирип,
Мени Мәжнүн еттиң, әрманий дүнья.

Мен бир пинҳан жайда мәкән тутайын,
Аҳ дарийғ деп менде шунда йатайын,
Зийўар айтар, қайсы бирин айтайын,
Бир күн гөрге салар, әрманий дүнья.

Bu dúnyada shadı-xorram bolmadım,
Qaldıń yúrágimdá, ármaniy dúnya,
Ayshıw-ishirát, zawqı-sapa súrmádim,
Qaldıń yúrágimdá, ármaniy dúnya.

Kiyerge sarpay yoq, minárgá at yoq,
Aspanǵa usharǵa mendá qanat yoq,
Shırmalıp yatarǵa bir páriyzat yoq,
Yúrák bawrım tildiń, ármaniy dúnya.

Mal-dúnyanı quwsam, ol meni kútmás,
Biriná yetsá de, biriná yetmás,
Bul dúnyanıń isi ólgánshá pitmás,
Qaldıń yúrágimdá, ármaniy dúnya,

Bir nesháni altın taqqa mindirip,
Birneshániń janǵan otın sóndirip,
Láyli kibi ıshqı otına kúydirip,
Meni Májnún ettiń, ármaniy dúnya.

Men bir pinhan jayda mákán tutayın,
Ah dariyǵ dep mende shunda yatayın,
Ziywar aytar, qaysı birin aytayın,
Bir kún górge salar, ármaniy dúnya.