Сөзле ҳа, бүлбил зибаным,
Еки келүр заман йоқты,
Кетер бир күн шийрин жаным,
Бу сәзимде гүман йоқты.

Жан бир гүлдүр солур олсә,
Әзрайылдың хабар келсә,
Жаның тәниңдиң айрылса,
Андын башқа яман йоқты.

Кимлер ашық болып өтти,
Кимлер мақсуўдына йетти,
Қара ер бәршесин йутты,
Ялған дүнья қоян йоқты.

Өзиң билән ҳәм қыз-жаўан,
Ойнап күлип сүрер дәўран,
Бәршә бул дүньяға меҳман,
Тири йүрәр заман йоқты.

Қыз-йигитлер өзин биләр,
Ялғаншыда дәўран сүрәр,
Аман кетмәс, бәри өлүр,
Бү сөзимдә гүман йоқты.

Мен әйләсәм бир-бир баян,
Паний ермиш ошбу жаҳан.
Искендер Рустәму дәстан,
Ол ҳәм тири йурән йоқты,

Дүньяны йығнаған Қарун,
Бир өзи болып саҳып дүн,
Аны ҳәм йер йутты бир күн,
Зиндан дүнья қоян йоқты.

Ким анадан ялғыз туғса,
Меҳрибан ғамхор йоқ болса,
Алған яры яман болса,
Андын башқа зыян йоқты.

Яман олса зүриядың,
Шықмас дүньяда ҳеш адың,
Болмас ҳасла көңил шадың,
Бул сөзимдә гүман йоқты.

Қашан болса дәўлетиңиз,
Кетер иззет ҳүрметиңиз,
Билгил, артар мийнетиңиз,
Шындур сөзим ялан йоқты.

Йигитлер, күлип шад олың,
Ушбу сөзге қулақ салың,
Мәстиў-хуррам болып күлиң,
Ҳеш ким мундай болан йоқты.

Өтти Юсип ҳәм Зүлайха,
Ҳүрий, ғулманыў Мәлийкә,
Аңа ашық болан Ҳәмра,
Бәри тири йүрән йоқты.

Ақтым дәрьядек жош урып,
Сөз үстине сөз ашурып,
Шүкир ҳаққа қол қаўшурып,
Бу көңлимде әрман йоқты.

Әзиз айтур кешә-күндиз,
Асмандадур айы-йулдыз,
Сәйид Әлий өзи гүл йуз,
Андын нәрсе қалан йоқты.

Көңлимдә ғам, дәрди әләм,
Сөзләсәм шықар дәмбәдәм,
Мәңа сөздиң башқа игәм,
Ҳешнәмәрсә берән йоқты.

Sózle ha, búlbil zibanım,
Eki kelúr zaman yoqtı,
Keter bir kún shiyrin janım,
Bu sázimde gúman yoqtı.

Jan bir gúldúr solur olsá,
Ázrayıldıń xabar kelsá,
Janıń tánińdiń ayrılsa,
Andın bashqa yaman yoqtı.

Kimler ashıq bolıp ótti,
Kimler maqsuwdına yetti,
Qara er bárshesin yuttı,
Yalǵan dúnya qoyan yoqtı.

Óziń bilán hám qız-jawan,
Oynap kúlip súrer dáwran,
Bárshá bul dúnyaǵa mehman,
Tiri yúrár zaman yoqtı.

Qız-yigitler ózin bilár,
Yalǵanshıda dáwran súrár,
Aman ketmás, bári ólúr,
Bú sózimdá gúman yoqtı.

Men áylásám bir-bir bayan,
Paniy ermish oshbu jahan.
Ískender Rustámu dástan,
Ol hám tiri yurán yoqtı,

Dúnyanı yıǵnaǵan Qarun,
Bir ózi bolıp sahıp dún,
Anı hám yer yuttı bir kún,
Zindan dúnya qoyan yoqtı.

Kim anadan yalǵız tuǵsa,
Mehriban ǵamxor yoq bolsa,
Alǵan yarı yaman bolsa,
Andın bashqa zıyan yoqtı.

Yaman olsa zúriyadıń,
Shıqmas dúnyada hesh adıń,
Bolmas hasla kóńil shadıń,
Bul sózimdá gúman yoqtı.

Qashan bolsa dáwletińiz,
Keter izzet húrmetińiz,
Bilgil, artar miynetińiz,
Shındur sózim yalan yoqtı.

Yigitler, kúlip shad olıń,
Ushbu sózge qulaq salıń,
Mástiw-xurram bolıp kúliń,
Hesh kim munday bolan yoqtı.

Ótti Yusip hám Zúlayxa,
Húriy, ǵulmanıw Máliyká,
Ańa ashıq bolan Hámra,
Bári tiri yúrán yoqtı.

Aqtım dáryadek josh urıp,
Sóz ústine sóz ashurıp,
Shúkir haqqa qol qawshurıp,
Bu kóńlimde árman yoqtı.

Áziz aytur keshá-kúndiz,
Asmandadur ayı-yuldız,
Sáyid Áliy ózi gúl yuz,
Andın nárse qalan yoqtı.

Kóńlimdá ǵam, dárdi álám,
Sózlásám shıqar dámbádám,
Máńa sózdiń bashqa igám,
Heshnámársá berán yoqtı.