Сағынып, сарғайып, жазған хатыңды,
Жиберген моллаңдын алдым, дилбәрим,
Хаттан оқып Гүлжан деген атыңды,
Өзиңди көргендей болдым, дилбәрим.

Айралықтың сырын ашты қағазың,
Өли едим, тирилтти жазған баязың,
Соннан бәҳре алып шықты ҳаўазым,
Жисмиме жан кирди яне, дилбәрим.

Хатың келип, қыс күнимди жаз етти,
Бағрымды жибитип, муңлы саз етти,
Ышқ отлары бирден жанды, ўаз етти,
Бәрекелле ақлы ҳуўшыңа, дилбәрим.

Ҳәр қайда болсаңда мениң ярымсаң,
Ҳаққа йығлап тапқан интизарымсаң,
Ҳәсте болсам дәўа болар дәримсең,
Сеннен басқа ҳеш кимим жоқ дилбәрим.

Ара дәш болса да, мен дөнмем сендин,
Шын ашықпан, гүман етпе сен мәндин,
Арттырып сөз жазба бундан сон шендин,
Сәндин өзге кеңил хош жоқ, дилбәрим.

Қудай қосса қосылармыз бир заман,
Соннан басқа ҳәзир бизде жоқ әрман,
Хатың болды мениң дәртиме дәрман,
Кешикпей барарман сабыр ет, дилбәрим,

Көңлим жәм болмай тур депсең сөзиңде,
Ол сөзиңниң парқын билдим гезинде,
Хат жазып тураман етпеймен кенде,
Өзиңе өзиң тәселле бер, дилбәрим.

Бизге де, сизге де болып тур обал,
Бул сөзиме пәрийзадым қулақ сал,
Бәндениң басына түсер түрли ҳал,
Ҳәр истиң ахыры болсын дилбәрим.

Сениң билмей бизиң елге келишиң,
Сапар шыққанымды соңыра билишиң,
Сен өзиңди мәңа рәўа көришиң,
Ашықлыққа дәлалатдур, дилбәрим.

Мениң ушын болма зарыў-сәргиздан,
Дәртимди қозғамай отыр шадыман,
Талабымды болып барсам мен аман,
Мақсетке жетермиз бир күн, дилбәрим,

Өзим барда бола берди иркиниш,
Пайдасы жоқ қылған менен өкиниш,
Ҳәр нәрсени ойлай бермей тур тыныш,
Өлмесем барарман елге, дилбәрим.

Шадлықта тут, мәрт бол ҳәр иске дайым,
Мени келмейди деп шегипсең уўайым,
Яр болса бизлерге қәдир қудайым,
Бир күншелли болмас ҳәсирет, дилбәрим.

Қайыл қалдым сениң айтқан сөзиңе,
Аҳ-уҳ пенен дағ салмағыл жүзине,
Ҳәр бир исте мәртликти ал өзиңе,
Көрисермиз, хош болып тур, дилбәрим.

Saǵınıp, sarǵayıp, jazǵan xatıńdı,
Jibergen mollańdın aldım, dilbárim,
Xattan oqıp Gúljan degen atıńdı,
Ózińdi kórgendey boldım, dilbárim.

Ayralıqtıń sırın ashtı qaǵazıń,
Óli edim, tiriltti jazǵan bayazıń,
Sonnan báhre alıp shıqtı hawazım,
Jismime jan kirdi yane, dilbárim.

Xatıń kelip, qıs kúnimdi jaz etti,
Baǵrımdı jibitip, muńlı saz etti,
Ishq otları birden jandı, waz etti,
Bárekelle aqlı huwshıńa, dilbárim.

Hár qayda bolsańda meniń yarımsań,
Haqqa yıǵlap tapqan intizarımsań,
Háste bolsam dáwa bolar dárimseń,
Sennen basqa hesh kimim joq dilbárim.

Ara dásh bolsa da, men dónmem sendin,
Shın ashıqpan, gúman etpe sen mándin,
Arttırıp sóz jazba bundan son shendin,
Sándin ózge keńil xosh joq, dilbárim.

Quday qossa qosılarmız bir zaman,
Sonnan basqa házir bizde joq árman,
Xatıń boldı meniń dártime dárman,
Keshikpey bararman sabır et, dilbárim,

Kóńlim jám bolmay tur depseń sózińde,
Ol sózińniń parqın bildim gezinde,
Xat jazıp turaman etpeymen kende,
Ózińe óziń táselle ber, dilbárim.

Bizge de, sizge de bolıp tur obal,
Bul sózime páriyzadım qulaq sal,
Bándeniń basına túser túrli hal,
Hár istiń axırı bolsın dilbárim.

Seniń bilmey biziń elge kelishiń,
Sapar shıqqanımdı sońıra bilishiń,
Sen ózińdi máńa ráwa kórishiń,
Ashıqlıqqa dálalatdur, dilbárim.

Meniń ushın bolma zarıw-sárgizdan,
Dártimdi qozǵamay otır shadıman,
Talabımdı bolıp barsam men aman,
Maqsetke jetermiz bir kún, dilbárim,

Ózim barda bola berdi irkinish,
Paydası joq qılǵan menen ókinish,
Hár nárseni oylay bermey tur tınısh,
Ólmesem bararman elge, dilbárim.

Shadlıqta tut, márt bol hár iske dayım,
Meni kelmeydi dep shegipseń uwayım,
Yar bolsa bizlerge qádir qudayım,
Bir kúnshelli bolmas hásiret, dilbárim.

Qayıl qaldım seniń aytqan sózińe,
Ah-uh penen daǵ salmaǵıl júzine,
Hár bir iste mártlikti al ózińe,
Kórisermiz, xosh bolıp tur, dilbárim.