Ышқ отына түшкен жигит мәрт болар,
Шеккени күн-түни аҳ-ҳәсирет болар,
Ашықлық дегениң яман дәрт болар,
Тәўеккәлди бир аллаға қыл енди.

Көп қайғырсаң көзлериңе нәм толар,
Думан басып жәҳан жүзи зәң болар,
Қызыл жүзиң зағыфрандай рәң болар,
Сәўер ярым, менин фәндим ал енди.

Ашықлық ямандур жүзиң солдырур,
Ышқына төзбеген дәрттен болдырур,
Сырласпасаң ишиң толып өлтирур,
Биз бенен мудамы сырлас бол енди.

Аҳ мени ярым деп пәрияд әйлеме,
Берк әйле кеўлиңди нашад әйлеме,
Яқшыны нийет қыл, яман сөйлеме,
Бул сөзди ядыңа яхшы ал енди.

Ғайры менен босқа үлфәт болмағыл,
Өзиңе ҳәм маған қайғы салмағыл,
Менде басқа яр йоқ гүман қылмағыл,
Мен сениң ярыңман тахиқ бил енди.

Сен мениң ҳақ қосқан сәўер ярымсаң,
Ялғаншы дүньяда ҳәрне барымсаң,
Кеше-күндиз мениң интизарымсаң,
Шын ашықпан буған инан сен енди.

Қосқай дийип бир алладан тилермен,
Ышқың фырақына дайым шүмермен,
Таҳир киби ҳәр қыялға дөнермен,
Зийўәриңди ҳайран етпей тур енди.

Ishq otına túshken jigit márt bolar,
Shekkeni kún-túni ah-hásiret bolar,
Ashıqlıq degeniń yaman dárt bolar,
Táwekkáldi bir allaǵa qıl endi.

Kóp qayǵırsań kózlerińe nám tolar,
Duman basıp jáhan júzi záń bolar,
Qızıl júziń zaǵıfranday ráń bolar,
Sáwer yarım, menin fándim al endi.

Ashıqlıq yamandur júziń soldırur,
Ishqına tózbegen dártten boldırur,
Sırlaspasań ishiń tolıp óltirur,
Biz benen mudamı sırlas bol endi.

Ah meni yarım dep páriyad áyleme,
Berk áyle kewlińdi nashad áyleme,
Yaqshını niyet qıl, yaman sóyleme,
Bul sózdi yadıńa yaxshı al endi.

Ǵayrı menen bosqa úlfát bolmaǵıl,
Ózińe hám maǵan qayǵı salmaǵıl,
Mende basqa yar yoq gúman qılmaǵıl,
Men seniń yarıńman taxiq bil endi.

Sen meniń haq qosqan sáwer yarımsań,
Yalǵanshı dúnyada hárne barımsań,
Keshe-kúndiz meniń intizarımsań,
Shın ashıqpan buǵan inan sen endi.

Qosqay diyip bir alladan tilermen,
Ishqıń fıraqına dayım shúmermen,
Tahir kibi hár qıyalǵa dónermen,
Ziywárińdi hayran etpey tur endi.