Ағалар, ярым тәрийпи,
Зулпы янағына түсер,
Сағағына дизсә мәржан,
Ошал буғағына түсер.

Бул жаҳанә түшмүш лапы,
Әлпи әдепли, әрканлы,
Салланғанда сыя-зулпы,
Ярдың қушағына түсер.

Салып тилла биләзикти,
Қасы-йай, көзи сүзикти,
Шығарса алтын жүзикти,
Қайтып бармағына түсер.

Таққан өңирге моншағы,
Гәўҳәрленген тулымшағы,
Алтынлап өрген шашпағы,
Жүрсе өкшесине түсер.

Сөз жайылар елдән-елә,
Сөзлер шығар дилдән-дилә
Пәрўаз етип гүлдән-гүлә,
Барып путағына түсер,

Сәйил етип шықса салланып,
Яр қасын қақса таўланып,
Зийўар айтур күйип-жанып,
Өз-өзиден отқа түсер.

Aǵalar, yarım táriypi,
Zulpı yanaǵına túser,
Saǵaǵına dizsá márjan,
Oshal buǵaǵına túser.

Bul jahaná túshmúsh lapı,
Álpi ádepli, árkanlı,
Sallanǵanda sıya-zulpı,
Yardıń qushaǵına túser.

Salıp tilla bilázikti,
Qası-yay, kózi súzikti,
Shıǵarsa altın júzikti,
Qaytıp barmaǵına túser.

Taqqan óńirge monshaǵı,
Gáwhárlengen tulımshaǵı,
Altınlap órgen shashpaǵı,
Júrse ókshesine túser.

Sóz jayılar eldán-elá,
Sózler shıǵar dildán-dilá
Párwaz etip gúldán-gúlá,
Barıp putaǵına túser,

Sáyil etip shıqsa sallanıp,
Yar qasın qaqsa tawlanıp,
Ziywar aytur kúyip-janıp,
Óz-óziden otqa túser.