Бозатаўлы гүлбинәфша нәзелим,
Әсәлиң ҳәррени гүлден бездирер,
Кирпиклериң сүзип баққан нәзериң,
Жулдызды жаўратып, түннен бездирер.

Жамалың бир көрип кеттим димардан,
Йүзүмни үгирдим шамси-қамардан,
Өзимни бездирип сабыр-қарардан,
Сабырыў-қарарымды меннен бездирер.

Қумырысқадек қыпша-қыпша беллерин,
Бармақ толы йүзүк-йүзүк әллериң,
Әсел қатқан сүжик-сүжүк тиллериң,
Жыланды жылжытып иннен бездирер.

Фәлекниң ойыны – Жәйҳун гирдабы,
Бир тәбәссим етсен көңлимниң табы,
Ышқы ләшкериңниң дәҳшәт сәркабы,
Бул аманат жанды тәннен бездирер,

Писте бурыныңда тилла әребек,
Екки қара көзиң екки бәледек,
Үргениш йуртунда бегим Төребек,
Тахтынан тайдырып, елден бездирер.

Көңлим сәдебини бир-бир яздырып.
Қайта бастан гөне дәртим қоздырып,
Капир көзиң мусулманды азғырып,
Бийшара Зийўарды диннен бездирер.

Bozatawlı gúlbináfsha názelim,
Ásáliń hárreni gúlden bezdirer,
Kirpikleriń súzip baqqan názeriń,
Juldızdı jawratıp, túnnen bezdirer.

Jamalıń bir kórip kettim dimardan,
Yúzúmni úgirdim shamsi-qamardan,
Ózimni bezdirip sabır-qarardan,
Sabırıw-qararımdı mennen bezdirer.

Qumırısqadek qıpsha-qıpsha bellerin,
Barmaq tolı yúzúk-yúzúk álleriń,
Ásel qatqan sújik-sújúk tilleriń,
Jılandı jıljıtıp innen bezdirer.

Fálekniń oyını – Jáyhun girdabı,
Bir tábássim etsen kóńlimniń tabı,
Ishqı láshkerińniń dáhshát sárkabı,
Bul amanat jandı tánnen bezdirer,

Piste burınıńda tilla árebek,
Ekki qara kóziń ekki báledek,
Úrgenish yurtunda begim Tórebek,
Taxtınan taydırıp, elden bezdirer.

Kóńlim sádebini bir-bir yazdırıp.
Qayta bastan góne dártim qozdırıp,
Kapir kóziń musulmandı azǵırıp,
Biyshara Ziywardı dinnen bezdirer.