Алсаң нәсийхатым, тутат сөзимди,
Өлтир көк ийтиңди, Дүйсен қандекли.
Ақыр абройсыз етер өзиңди,
Өлтир көк ийтиңди, Дүйсен қандекли.

Ийт уғырлық қылмас бежерсең бастан,
Күнде бир тойдырсаң қарныны аштан,
Кимсәни айырар сыпыра-шанаштан,
Өлтир көк ийтиңди, Дүйсен қандекли.

Бул ийт уғырлық қылар яқын, йырақтан,
Кимди айырар майдан, кимди-торақтан,
Айрылық көшерсең күлкихожақтан,
Өлтир көк ийтиңди, Дүйсен қандекли.

Ҳәр қәдем атқанда таўшан алмас ҳәм,
Атасы арабтан туўра келсе ҳәм,
Әкеңниң көзини көрип қалса ҳәм,
Өлтир көк ийтиңди, Дүйсен қандекли.

Сүриўли қойың жоқ, я пада малың,
Сонда ҳәм мурныңда бир қап шамалың,
Әлҳасыл, өзиңе қалар обалың,
Сол ийтиңди өлтирмесең, қандекли.

Бул ийтиңниң пайдасынан көшпесең,
Я айрылып, елден аўлақ көшпесең,
Жегип күшин, саўып сүтин ишпесең,
Өлтир көк ийтиңди, Дүйсен қандекли.

Alsań násiyxatım, tutat sózimdi,
Óltir kók iytińdi, Dúysen qandekli.
Aqır abroysız eter ózińdi,
Óltir kók iytińdi, Dúysen qandekli.

Íyt uǵırlıq qılmas bejerseń bastan,
Kúnde bir toydırsań qarnını ashtan,
Kimsáni ayırar sıpıra-shanashtan,
Óltir kók iytińdi, Dúysen qandekli.

Bul iyt uǵırlıq qılar yaqın, yıraqtan,
Kimdi ayırar maydan, kimdi-toraqtan,
Ayrılıq kósherseń kúlkixojaqtan,
Óltir kók iytińdi, Dúysen qandekli.

Hár qádem atqanda tawshan almas hám,
Atası arabtan tuwra kelse hám,
Ákeńniń kózini kórip qalsa hám,
Óltir kók iytińdi, Dúysen qandekli.

Súriwli qoyıń joq, ya pada malıń,
Sonda hám murnıńda bir qap shamalıń,
Álhasıl, ózińe qalar obalıń,
Sol iytińdi óltirmeseń, qandekli.

Bul iytińniń paydasınan kóshpeseń,
Ya ayrılıp, elden awlaq kóshpeseń,
Jegip kúshin, sawıp sútin ishpeseń,
Óltir kók iytińdi, Dúysen qandekli.