Адамды жаратқан қәдир қудайым,
Бендеңе тәўекел рәҳим керекти,
Панаҳыңда қуп сақлаңыз илаҳым,
Бир басқа бир өлим болса керекти.

Мен өзим йығлайман рәҳим ет дийип,
Ойлаған ой мақсетиме жет дийип,
Жол болғызып шадыманлық ет дийип,
Бир басқа бир саўда болса керекти.

Заманның пәсенти жыл-жылдан бетер,
Ҳәрким биле-билсе қорыққанын күтер,
Патша, беглер ҳалыққа қысымын етер,
Буған қашан зәўлим болса керекти.

Бенделер ҳәсиретте, қайғыў-ғәплетте,
Бир теңлик деп бирнешелер үмитте,
Қудайым қалдырма қайғы-ҳәсиретте,
Бир басқа бир саўда болса керекти.

Ақыллы бол адамларға көп сардар,
Ойлан, болмас иске сен болма қардар,
Халықты йығлатса бирнешше мурдар,
Залым иси раўан болмас керекти.

Бул дүньяға келген менен өлерсең,
Өлмесең ақыры нәўбет көрерсең,
Ҳәм пасент ғәплет пенен жүрерсең,
Бир басқа бир саўда болса керекти.

Дүньяға шыққан соң шалқып жүриўге,
Жақсы-жаман, заўқы-сапа сүриўге,
Шады қуррамлықты бәлки көриўге,
Халық билен ғалаба ғайрат керекти.

Адамлар ҳәрдайым көтерер басын,
Көзиниң сүртерге халық билен жасын,
Күш келтирер, ҳуш келтирер ықласың,
Ғалаба атланыс болса керекти.

Зийўар шеккер бул айтылған сөзине,
Асығыста айтты керек сөзини,
Мақтанғандай бул қағаздың жүзине,
Тәрип етип айталмаса керекти.

Adamdı jaratqan qádir qudayım,
Bendeńe táwekel ráhim kerekti,
Panahıńda qup saqlańız ilahım,
Bir basqa bir ólim bolsa kerekti.

Men ózim yıǵlayman ráhim et diyip,
Oylaǵan oy maqsetime jet diyip,
Jol bolǵızıp shadımanlıq et diyip,
Bir basqa bir sawda bolsa kerekti.

Zamannıń pásenti jıl-jıldan beter,
Hárkim bile-bilse qorıqqanın kúter,
Patsha, begler halıqqa qısımın eter,
Buǵan qashan záwlim bolsa kerekti.

Bendeler hásirette, qayǵıw-ǵáplette,
Bir teńlik dep birnesheler úmitte,
Qudayım qaldırma qayǵı-hásirette,
Bir basqa bir sawda bolsa kerekti.

Aqıllı bol adamlarǵa kóp sardar,
Oylan, bolmas iske sen bolma qardar,
Xalıqtı yıǵlatsa birneshshe murdar,
Zalım isi rawan bolmas kerekti.

Bul dúnyaǵa kelgen menen ólerseń,
Ólmeseń aqırı náwbet kórerseń,
Hám pasent ǵáplet penen júrerseń,
Bir basqa bir sawda bolsa kerekti.

Dúnyaǵa shıqqan soń shalqıp júriwge,
Jaqsı-jaman, zawqı-sapa súriwge,
Shadı qurramlıqtı bálki kóriwge,
Xalıq bilen ǵalaba ǵayrat kerekti.

Adamlar hárdayım kóterer basın,
Kóziniń súrterge xalıq bilen jasın,
Kúsh keltirer, hush keltirer ıqlasıń,
Ǵalaba atlanıs bolsa kerekti.

Ziywar shekker bul aytılǵan sózine,
Asıǵısta ayttı kerek sózini,
Maqtanǵanday bul qaǵazdıń júzine,
Tárip etip aytalmasa kerekti.