Баҳадыр ғошшақ жигитке,
Халыққа мәлим батыр мәртке,
Бәрдаш берер қайғы дәртке,
Жанажан ғардашы керек.

Жигит шықса узақ жолға,
Жаў-жарағын алып қолға,
Сермеп қылыш оңлы-солға,
Жол баслар сәрдары керек.

Малы көп сансыз байларға,
Апармай мереке-тойларға,
Кейнине салыўға қойларга,
Қулағы кесик қул керек.

Ўақтым өтти сәрдар деген,
Саўаш болса қардар деген,
Бул гәпимниң парқын билген,
Удайына айтыў керек.

Сөгис келтирип атаға,
Исин жиберип қатаға,
Аўылдағы кәтқудаға,
Саны жоқ пара пул керек.

Халық сораған аталыққа,
Исин жүритип қаталлыққа,
Күш берип өнбес салыққа,
Халықты постырған шул керек.

Қумартып тегин ақшаға,
Адамды көмип пақшаға,
Халықты сораған патшаға,
Күнде-күнде урыс керек.

Сорлы пухара халыққа,
Қол созып бәрҳә жарыққа,
Көнбей бирнеше салыққа,
Жайнап-жаснар заман керек.

Өмиринше жарымай пулға,
Иси баспай бәрҳа оңға,
Сорқайнаған сорлы қулға,
Жайнап-жаснар заман керек.

Шад болып дәўран сүриўге,
Паянлы дүнья көриўге.
Қатар-қурбы менен жүриўге,
Әжиниязға заман керек.

Bahadır ǵoshshaq jigitke,
Xalıqqa málim batır mártke,
Bárdash berer qayǵı dártke,
Janajan ǵardashı kerek.

Jigit shıqsa uzaq jolǵa,
Jaw-jaraǵın alıp qolǵa,
Sermep qılısh ońlı-solǵa,
Jol baslar sárdarı kerek.

Malı kóp sansız baylarǵa,
Aparmay mereke-toylarǵa,
Keynine salıwǵa qoylarga,
Qulaǵı kesik qul kerek.

Waqtım ótti sárdar degen,
Sawash bolsa qardar degen,
Bul gápimniń parqın bilgen,
Udayına aytıw kerek.

Sógis keltirip ataǵa,
Ísin jiberip qataǵa,
Awıldaǵı kátqudaǵa,
Sanı joq para pul kerek.

Xalıq soraǵan atalıqqa,
Ísin júritip qatallıqqa,
Kúsh berip ónbes salıqqa,
Xalıqtı postırǵan shul kerek.

Qumartıp tegin aqshaǵa,
Adamdı kómip paqshaǵa,
Xalıqtı soraǵan patshaǵa,
Kúnde-kúnde urıs kerek.

Sorlı puxara xalıqqa,
Qol sozıp bárhá jarıqqa,
Kónbey birneshe salıqqa,
Jaynap-jasnar zaman kerek.

Ómirinshe jarımay pulǵa,
Ísi baspay bárha ońǵa,
Sorqaynaǵan sorlı qulǵa,
Jaynap-jasnar zaman kerek.

Shad bolıp dáwran súriwge,
Payanlı dúnya kóriwge.
Qatar-qurbı menen júriwge,
Ájiniyazǵa zaman kerek.