Бермес едим он көлге,
Көл ийеси мен болсам,
Көл сулыўы Соң көлде
Мен болсам да сен болсаң.

Таң атқанда оянсаң,
Көл суўына шомылсаң,
Аққуўдай боп тарансаң,
Қапталыңда мен болсам.

Қосықлар келсе дөреўге,
Қалсаң көлде түнеўге,
«Сүйемен» десең биреўге,
Сол биреўиң мен болсам.

Болот болсам жылқы айдар,
Тартып алсам Жантайдан.
Сулыўлықта халық айтар
Ақ мөр менен тең болсаң.

Төртеў қалсақ аўлақта:
Самал ессе таў жақтан,
Соң көл менен сол ўақта
Сен болсаң да мен болсам.

Соң көлдиң жаўған қарында,
Жаслығымның барында,
Қалар едим Нарында,
Егер жаным сен қалсаң...

1973-жыл.
Ақмөр – халық аўзында ертек болған сулыў қыз, жылқыман Болот – оның ашығы (И.Ю.)

Bermes edim on kólge,
Kól iyesi men bolsam,
Kól sulıwı Soń kólde
Men bolsam da sen bolsań.

Tań atqanda oyansań,
Kól suwına shomılsań,
Aqquwday bop taransań,
Qaptalıńda men bolsam.

Qosıqlar kelse dórewge,
Qalsań kólde túnewge,
«Súyemen» deseń birewge,
Sol birewiń men bolsam.

Bolot bolsam jılqı aydar,
Tartıp alsam Jantaydan.
Sulıwlıqta xalıq aytar
Aq mór menen teń bolsań.

Tórtew qalsaq awlaqta:
Samal esse taw jaqtan,
Soń kól menen sol waqta
Sen bolsań da men bolsam.

Soń kóldiń jawǵan qarında,
Jaslıǵımnıń barında,
Qalar edim Narında,
Eger janım sen qalsań...

1973-jıl.
Aqmór – xalıq awzında ertek bolǵan sulıw qız, jılqıman Bolot – onıń ashıǵı (Í.Yu.)