Еккен пахтам абаланлық арқаўы,
Ерлик мийнет елдиң даңқын таратар.
Өз өзинен болмас ақ алтын таўы,
Ақ алтынды алтын қоллар жаратар.

Әл-ҳасылга бөлеп ўатан даласын,
Кеўлине орнатып күнниң қуяшын,
Көз нурынан тоқып ҳәр бир ханасын,
Ақ алтынды алтын қоллар жаратар.

Шөлистанды карталардан сыздырып,
«Ақ теңизде» «көк корабль» жүздирип,
Миллион тонналардан қырман сүздирип,
Алтын таўын алтын қоллар жаратар.

Балығым тири алтын, салым сары алтын,
Дыйқан елдиң қолы тийген жер алтын,
Халқым не дөретсе, соның бәри алтын,
Соның бәрин алтын қоллар жаратар.

Бул қоллардың несиеси нақ болар,
Қыймылдысы елге дәўлет-бақ болар,
Қолым қараўытса, жүзим ақ болар,
Ақ алтынды алтын қоллар жаратар.

Ekken paxtam abalanlıq arqawı,
Erlik miynet eldiń dańqın taratar.
Óz ózinen bolmas aq altın tawı,
Aq altındı altın qollar jaratar.

Ál-hasılga bólep watan dalasın,
Kewline ornatıp kúnniń quyashın,
Kóz nurınan toqıp hár bir xanasın,
Aq altındı altın qollar jaratar.

Shólistandı kartalardan sızdırıp,
«Aq teńizde» «kók korabl» júzdirip,
Million tonnalardan qırman súzdirip,
Altın tawın altın qollar jaratar.

Balıǵım tiri altın, salım sarı altın,
Dıyqan eldiń qolı tiygen jer altın,
Xalqım ne dóretse, sonıń bári altın,
Sonıń bárin altın qollar jaratar.

Bul qollardıń nesiesi naq bolar,
Qıymıldısı elge dáwlet-baq bolar,
Qolım qarawıtsa, júzim aq bolar,
Aq altındı altın qollar jaratar.