Астына минип жорғаны,
Кийипти өңкей торқаны,
Қасында болыс, порқаны,
Сондай болар бай баласы.

Тарлықты ҳеш бир ойламас,
Ылақ шаўып тойдан қалмас,
Айтқаныңа қулақ салмас,
Менмен болар бай баласы.

Жаман болса да жақсыдай,
Атағы бар айтарлықтай,
Келген сөзлерге тартынбай,
Сөйлер еркин бай баласы.

Қызларды көрсе қызығып,
Сөз салғанша асығып,
Жайраңлайды, жүрмес буғып,
Сондай еркин бай баласы.

Болса да мурны пушық,
Мыңқ-мыңқ етип айтар қосық,
Келбетин қарасаң – пасық,
Сонда да зор бай баласы.

Арқасы болса да бүкир,
Ҳалын билип етпес шүкир,
Иши қара толған пикир,
Ардаңлайды бай баласы.

Аўзы жыртық болсадағы,
Еситпесе де қулағы.
Қыйсық болса да аяғы,
Дүзиў-сәнли бай баласы.

Болсадағы көзи соқыр,
Етседағы мурны пыр-пыр,
Мерекеде алдында отыр,
Сонда да зор бай баласы.

Қол созып ушқан қусларға,
Салқын түсирип жазларға,
Ылақ таслайды қызларға,
Кеўли өсип бай баласы.

Қызлардың иши күйеди,
Басларын жорта ийеди,
Ҳәр ким тапқанын түйеди,
Той баслайды бай баласы.

Astına minip jorǵanı,
Kiyipti óńkey torqanı,
Qasında bolıs, porqanı,
Sonday bolar bay balası.

Tarlıqtı hesh bir oylamas,
Ilaq shawıp toydan qalmas,
Aytqanıńa qulaq salmas,
Menmen bolar bay balası.

Jaman bolsa da jaqsıday,
Ataǵı bar aytarlıqtay,
Kelgen sózlerge tartınbay,
Sóyler erkin bay balası.

Qızlardı kórse qızıǵıp,
Sóz salǵansha asıǵıp,
Jayrańlaydı, júrmes buǵıp,
Sonday erkin bay balası.

Bolsa da murnı pushıq,
Mıńq-mıńq etip aytar qosıq,
Kelbetin qarasań – pasıq,
Sonda da zor bay balası.

Arqası bolsa da búkir,
Halın bilip etpes shúkir,
Íshi qara tolǵan pikir,
Ardańlaydı bay balası.

Awzı jırtıq bolsadaǵı,
Esitpese de qulaǵı.
Qıysıq bolsa da ayaǵı,
Dúziw-sánli bay balası.

Bolsadaǵı kózi soqır,
Etsedaǵı murnı pır-pır,
Merekede aldında otır,
Sonda da zor bay balası.

Qol sozıp ushqan quslarǵa,
Salqın túsirip jazlarǵa,
Ilaq taslaydı qızlarǵa,
Kewli ósip bay balası.

Qızlardıń ishi kúyedi,
Basların jorta iyedi,
Hár kim tapqanın túyedi,
Toy baslaydı bay balası.