Еки қулағы салынған,
«Саў» – деп маңырап жалынған,
Он бес жыл жүрип алынған,
Рейим аға, бир ешким бар.

Саўрысын көрсең қалақтай,
Өкпеси искен талақтай,
Сүти таўдағы булақтай
Рейим аға, бир ешким бар.

Жалғыз болсада мыңдай маған,
Айтарлық сөз усы саған,
Айтсам жағар сөзим оған,
Жанымнан жақсы ешким бар.

Бир-биреўге етип мирәт,
Көрдим аға жүдә рәҳәт,
Қудайға жүз де рахмет,
Бир енди жалғыз ешким бар.

Кешиўлер болса, кешип кет,
Шешиўлер болса, шешип кет,
Ағажан келип, сүт ишип кет,
Ағажан, жалғыз ешким бар.

Eki qulaǵı salınǵan,
«Saw» – dep mańırap jalınǵan,
On bes jıl júrip alınǵan,
Reyim aǵa, bir eshkim bar.

Sawrısın kórseń qalaqtay,
Ókpesi isken talaqtay,
Súti tawdaǵı bulaqtay
Reyim aǵa, bir eshkim bar.

Jalǵız bolsada mıńday maǵan,
Aytarlıq sóz usı saǵan,
Aytsam jaǵar sózim oǵan,
Janımnan jaqsı eshkim bar.

Bir-birewge etip mirát,
Kórdim aǵa júdá ráhát,
Qudayǵa júz de raxmet,
Bir endi jalǵız eshkim bar.

Keshiwler bolsa, keship ket,
Sheshiwler bolsa, sheship ket,
Aǵajan kelip, sút iship ket,
Aǵajan, jalǵız eshkim bar.