Сарылып күни-түн қойдың изинде,
Қан қалмай сарғайып қызыл жүзинде,
Қанды жас қапланып еки көзинде,
Қула дүзде жүрген мынаў шопанлар.

Ийнинде жумыры салынған торға,
Меслерин арқалап қозғалып зорға,
Төслери қайқайып шығалмай қырға,
Асқар қумды аралаған шопанлар.

Шарықтан шырмалып еки аяғы,
Аўыр болып талдан кескен таяғы,
Аўыр сөзге ҳәм сарсылып қулағы,
Қула дүзде қайғыда жүр шопанлар.

Үстинде шапаны бийтлери ағып,
Қанын сорып, арқасына от жағып,
Тикен кирип аяғынан қан ағып,
Етиксиз тоғайда жүрген шопанлар.

Киминиң арқасын таяқлар тилген,
Биразының қолы отларға күйген,
Жасы жетпей қыпша бели бүгилген,
Сансыз қой кейнинде жүрген шопанлар.

Ата-аналары өлип жасынан,
Таз болып торағы ағып басынан,
Қызыл қум сел болып көздиң жасынан,
Жай табалмай жүрген мынаў шопанлар.

Аш болса кейнине ермей ийтлери,
Тарыққаннан тарғыл болып бетлери,
Қус түткендей тилким-тилким етлери,
Азаптан шыға алмай жүрген шопанлар.

Жетим болып шарға болған бойлары,
Артық ҳәммелерден ақыл-ойлары,
Қайысып баққаны байдың қойлары,
Бир ылаққа үш жыл жүрген шопанлар.

Қайнаған ыссыда қумларды басып,
Алаңлап көзлери, ақылдан сасып,
Қойы жайылғанда арқасын қасып,
Күни ушын жүрген ғәрип шопанлар.

Беллери бүгилип, көзлери тынып,
Жаталмай дем алып бир майдан жылып,
Топыраққа былғанып, терлери ағып,
Төсексиз далада жатқан шопанлар.

Sarılıp kúni-tún qoydıń izinde,
Qan qalmay sarǵayıp qızıl júzinde,
Qandı jas qaplanıp eki kózinde,
Qula dúzde júrgen mınaw shopanlar.

Íyninde jumırı salınǵan torǵa,
Meslerin arqalap qozǵalıp zorǵa,
Tósleri qayqayıp shıǵalmay qırǵa,
Asqar qumdı aralaǵan shopanlar.

Sharıqtan shırmalıp eki ayaǵı,
Awır bolıp taldan kesken tayaǵı,
Awır sózge hám sarsılıp qulaǵı,
Qula dúzde qayǵıda júr shopanlar.

Ústinde shapanı biytleri aǵıp,
Qanın sorıp, arqasına ot jaǵıp,
Tiken kirip ayaǵınan qan aǵıp,
Etiksiz toǵayda júrgen shopanlar.

Kiminiń arqasın tayaqlar tilgen,
Birazınıń qolı otlarǵa kúygen,
Jası jetpey qıpsha beli búgilgen,
Sansız qoy keyninde júrgen shopanlar.

Ata-anaları ólip jasınan,
Taz bolıp toraǵı aǵıp basınan,
Qızıl qum sel bolıp kózdiń jasınan,
Jay tabalmay júrgen mınaw shopanlar.

Ash bolsa keynine ermey iytleri,
Tarıqqannan tarǵıl bolıp betleri,
Qus tútkendey tilkim-tilkim etleri,
Azaptan shıǵa almay júrgen shopanlar.

Jetim bolıp sharǵa bolǵan boyları,
Artıq hámmelerden aqıl-oyları,
Qayısıp baqqanı baydıń qoyları,
Bir ılaqqa úsh jıl júrgen shopanlar.

Qaynaǵan ıssıda qumlardı basıp,
Alańlap kózleri, aqıldan sasıp,
Qoyı jayılǵanda arqasın qasıp,
Kúni ushın júrgen ǵárip shopanlar.

Belleri búgilip, kózleri tınıp,
Jatalmay dem alıp bir maydan jılıp,
Topıraqqa bılǵanıp, terleri aǵıp,
Tóseksiz dalada jatqan shopanlar.