Ордық орақ, шаптық отын, қаздық жап,
Тердик масақ, ийнимизге салдық қап,
Жас өмирлер гүлдей солып, болдық сап,
Бул жүристен енди бизге күн қайда?

Орақ орып, өмир бойы болдық қул,
Ислесек те ала алмадық қара пул,
Не жананлар байы өлип қалды тул,
Енди буған жайнап-жаснар күн қайда?

Күни-түни ордық пишен, салыны,
Гүздиң күни жыйдық пискен тарыны,
Өмиринше бир тоймаған қарыны,
Аш, жалаңаш биз сорлыға күн қайда?

Салық салып усы ҳалға ҳәр дайым,
Салығын салыўға биз болдық қайым,
Бир жутым бул ўақта болды уўайым,
Бул жүристен енди бизге күн қайда?

Ийинге тартарлық және жоқ кийим,
Ҳәм де ағайин жоқ, қәўендер бейим,
Көсилип жатарға және жоқ үйим,
Бул жүристен енди бизге күн қайда?

Тапқанымыз жетпей қара теңгеге,
Аўыстырып кийим алып кийерге,
Ҳәм базарлық қатар-қурбы жеңгеге,
Алып барар енди бизге ҳал қайда?

Не пайда, жигитлер, жалғаншы дүнья,
Алдады бизлерди жол салып қыя,
Қара басқа бул не деген ўақыя,
Бул жүристен енди бизге ел қайда?

Ашығың бар еди, талмадай бойы,
Қатарынан артық ақыл ҳәм ойы,
Болар деп қуўанған жақсылық тойы,
Жийемурат, көретуғын күн қайда?

Жийемурат, сениң менен едим дос,
Жер айдасам, бирге барып салдым қос,
Жоқшылықтан, қалдың мине бүгин бос,
Ашығыңа жететуғын күн қайда?

Буяқтағы көрген қорлық-азапты,
Күни-түни етип аўыр талапты,
Шай орнына ишкен айран шалапты,
Қушақласып айтатуғын күн қайда?

Қайғыдан қарайып, қайнаған иши,
Билектен майрылып, жоқ болған күши,
Сайымбетжан едиң бизлерден киши,
Сақтың сынбай жүретуғын күн қайда?

Бес жасыңда ағаң менен қой бақтың,
Сен шопаны болдың майда ылақтың,
Жол тап, жан шырағым, сынбасын сақтың
Жайнап-жаснап туратуғын күн қайда?

Қасымдағы еки бирдей жолдасым,
Қайғылыққа түсти мениң бул басым,
Көзден көл-дәрья боп ақтылар жасым,
Бул дүньяға шыққан менен не пайда?

Ordıq oraq, shaptıq otın, qazdıq jap,
Terdik masaq, iynimizge saldıq qap,
Jas ómirler gúldey solıp, boldıq sap,
Bul júristen endi bizge kún qayda?

Oraq orıp, ómir boyı boldıq qul,
Íslesek te ala almadıq qara pul,
Ne jananlar bayı ólip qaldı tul,
Endi buǵan jaynap-jasnar kún qayda?

Kúni-túni ordıq pishen, salını,
Gúzdiń kúni jıydıq pisken tarını,
Ómirinshe bir toymaǵan qarını,
Ash, jalańash biz sorlıǵa kún qayda?

Salıq salıp usı halǵa hár dayım,
Salıǵın salıwǵa biz boldıq qayım,
Bir jutım bul waqta boldı uwayım,
Bul júristen endi bizge kún qayda?

Íyinge tartarlıq jáne joq kiyim,
Hám de aǵayin joq, qáwender beyim,
Kósilip jatarǵa jáne joq úyim,
Bul júristen endi bizge kún qayda?

Tapqanımız jetpey qara teńgege,
Awıstırıp kiyim alıp kiyerge,
Hám bazarlıq qatar-qurbı jeńgege,
Alıp barar endi bizge hal qayda?

Ne payda, jigitler, jalǵanshı dúnya,
Aldadı bizlerdi jol salıp qıya,
Qara basqa bul ne degen waqıya,
Bul júristen endi bizge el qayda?

Ashıǵıń bar edi, talmaday boyı,
Qatarınan artıq aqıl hám oyı,
Bolar dep quwanǵan jaqsılıq toyı,
Jiyemurat, kóretuǵın kún qayda?

Jiyemurat, seniń menen edim dos,
Jer aydasam, birge barıp saldım qos,
Joqshılıqtan, qaldıń mine búgin bos,
Ashıǵıńa jetetuǵın kún qayda?

Buyaqtaǵı kórgen qorlıq-azaptı,
Kúni-túni etip awır talaptı,
Shay ornına ishken ayran shalaptı,
Qushaqlasıp aytatuǵın kún qayda?

Qayǵıdan qarayıp, qaynaǵan ishi,
Bilekten mayrılıp, joq bolǵan kúshi,
Sayımbetjan ediń bizlerden kishi,
Saqtıń sınbay júretuǵın kún qayda?

Bes jasıńda aǵań menen qoy baqtıń,
Sen shopanı boldıń mayda ılaqtıń,
Jol tap, jan shıraǵım, sınbasın saqtıń
Jaynap-jasnap turatuǵın kún qayda?

Qasımdaǵı eki birdey joldasım,
Qayǵılıqqa tústi meniń bul basım,
Kózden kól-dárya bop aqtılar jasım,
Bul dúnyaǵa shıqqan menen ne payda?