Жолдан қайтып артыңа,
Салып көп исти ядыңа,
Қараны тутып алдыңа,
Қарындасым ҳеш ойланба.

Ис питпейди қыйланғаннан,
Пайда да жоқ ойланғаннан,
Парық болмас байланғаннан.
Қарындасым ҳеш ойланба.

Исенбе аға-жеңгеге,
Қуўанба таққан теңгеге,
Сырыңды айтпа өзгеге,
Сүймесиң ушын ойланба.

Қапа болма, теңиңди изле,
Хор болмастай жерди гөзле,
Жаман айтпа, жақсы сөзле,
Ҳақ иске ҳеш бир ойланба.

Малы көп деп кетпе оған,
Азап берер ахмақ саған,
Ўапасыз ол сөзи ялған,
Сүйгениңе ҳеш ойланба.

Келип тур мынаў сүйгениң,
Әзелде кеўил бергениң,
Көз ашып ҳәм де көргениң,
Соның ушын ҳеш ойланба.

Мин артына бүгин түнде,
Жылап жүрме күнде-күнде,
Соны ойлап турман мен де,
Оның ушын ҳеш ойланба.

Қара мал берген байыңа,
Қарарма ол ҳал-жайыңа?
Ылайықпа бул бойыңа?
Қосыл сүйгенге ойланба.

Зәңгиңди өзим басайын.
Душпан жүрегин осайын,
Дәрьядай болың тасайын,
Кел, қарындас, ҳеш ойланба.

Қолыңды берде де берман жүр,
Ойға алма бөтен пикир,
Қосылып узақ өмир сүр,
Мин артына ҳеш ойланба.

Joldan qaytıp artıńa,
Salıp kóp isti yadıńa,
Qaranı tutıp aldıńa,
Qarındasım hesh oylanba.

Ís pitpeydi qıylanǵannan,
Payda da joq oylanǵannan,
Parıq bolmas baylanǵannan.
Qarındasım hesh oylanba.

Ísenbe aǵa-jeńgege,
Quwanba taqqan teńgege,
Sırıńdı aytpa ózgege,
Súymesiń ushın oylanba.

Qapa bolma, teńińdi izle,
Xor bolmastay jerdi gózle,
Jaman aytpa, jaqsı sózle,
Haq iske hesh bir oylanba.

Malı kóp dep ketpe oǵan,
Azap berer axmaq saǵan,
Wapasız ol sózi yalǵan,
Súygenińe hesh oylanba.

Kelip tur mınaw súygeniń,
Ázelde kewil bergeniń,
Kóz ashıp hám de kórgeniń,
Sonıń ushın hesh oylanba.

Min artına búgin túnde,
Jılap júrme kúnde-kúnde,
Sonı oylap turman men de,
Onıń ushın hesh oylanba.

Qara mal bergen bayıńa,
Qararma ol hal-jayıńa?
Ilayıqpa bul boyıńa?
Qosıl súygenge oylanba.

Záńgińdi ózim basayın.
Dushpan júregin osayın,
Dáryaday bolıń tasayın,
Kel, qarındas, hesh oylanba.

Qolıńdı berde de berman júr,
Oyǵa alma bóten pikir,
Qosılıp uzaq ómir súr,
Min artına hesh oylanba.