Бул дүнья тарма, кең бе?
Ойлап мәнисин билмедим,
Бул өмирлер маған теңбе?
Не боларымды билмедим.

Айрылдым жалғыз қостардан,
Қуба қосақсыз қошқарман,
Асалмай қалдым асқардан,
Не боларымды билмедим.

Артымда аға-иним жоқ,
Жүрегимнен өтип жүр оқ,
Өтер басымнан дүнья б...
Не боларымды билмедим.

Өтер болдым өз дәўраным,
Шығар болды шыбын жаным,
Ағар болды қызыл қаным,
Не боларымды билмедим.

Белимде мәдар қалмады,
Көзим қызыққа тоймады,
Заман қайғымды жоймады,
Не боларымды билмедим.

Жастан айрылдым анадан,
Жетим қалдым ҳәм атадан,
Жуда болдым ғой панадан,
Не боларымды билмедим.

Үстимде жаман ылашық,
Оның да бар жери ашық,
Дүнья маған болды қашық.
Не боларымды билмедим.

Жүзим сарғайды қападан,
Өмирим хорланды қападан,
Жаңылдым нағып тобадан,
Не боларымды билмедим.

Жүрип душпанлар изимнен,
Айырды жақсы күнимнен,
Ләтте түспеди ийнимнен,
Не боларымды билмедим.

Аға беглер қулақ салып,
Мендей болмағай ҳалың,
Өлеғойсам еске алың.
Не боларымды билмедим.

Bul dúnya tarma, keń be?
Oylap mánisin bilmedim,
Bul ómirler maǵan teńbe?
Ne bolarımdı bilmedim.

Ayrıldım jalǵız qostardan,
Quba qosaqsız qoshqarman,
Asalmay qaldım asqardan,
Ne bolarımdı bilmedim.

Artımda aǵa-inim joq,
Júregimnen ótip júr oq,
Óter basımnan dúnya b...
Ne bolarımdı bilmedim.

Óter boldım óz dáwranım,
Shıǵar boldı shıbın janım,
Aǵar boldı qızıl qanım,
Ne bolarımdı bilmedim.

Belimde mádar qalmadı,
Kózim qızıqqa toymadı,
Zaman qayǵımdı joymadı,
Ne bolarımdı bilmedim.

Jastan ayrıldım anadan,
Jetim qaldım hám atadan,
Juda boldım ǵoy panadan,
Ne bolarımdı bilmedim.

Ústimde jaman ılashıq,
Onıń da bar jeri ashıq,
Dúnya maǵan boldı qashıq.
Ne bolarımdı bilmedim.

Júzim sarǵaydı qapadan,
Ómirim xorlandı qapadan,
Jańıldım naǵıp tobadan,
Ne bolarımdı bilmedim.

Júrip dushpanlar izimnen,
Ayırdı jaqsı kúnimnen,
Látte túspedi iynimnen,
Ne bolarımdı bilmedim.

Aǵa begler qulaq salıp,
Mendey bolmaǵay halıń,
Óleǵoysam eske alıń.
Ne bolarımdı bilmedim.