Келген соң адам көп жасқа,
Қартайған соң болар қәсте,
Гүңгиртленип көзли жаста,
Бул басымнан өттиң дәўран.

Тынлаң қурбы ҳәм қурдасым,
Жигирма бес өтти жасым,
Қайғыда болды бул басым,
Әрманлықта өттиң дәўран.

Мени салдың жанған отқа,
Өкпемди ҳәм қойып партқа,
Кем тасладың бизди артқа,
Сөйтип бизден өттиң дәўран.

Бай болмадым жыйнап малды,
Бий болмадым салып барды,
Бәри меннен арта қалды,
Кереги жоқ ондай дәўран.

Байға бардың, бахыт болдың,
Сынбайтуғын сахыт болдың,
Жөнин таптың қыйсық жолдың
Ҳәркимлерге кеттиң дәўран.

Жарлы адамға жантаспайсаң,
Көпке дейин уялмайсаң,
Қалай-аў деп ойланбайсаң,
Бизден қашып жүрсең дәўран.

Астымда жоқ көлик ешек,
Төсенгеним топырақ, кесек,
Малы жоқты еттиң өсек,
Күлки еттиң бизди дәўран.

Ата-анама келмедиң,
Бизге мал-ҳалды бермедиң,
Көзлердиң жасын көрмедиң,
Бул басымнан өттиң дәўран.

Енди маған керегиң жоқ,
Жүрегимнен өткенде оқ,
Басымнан өтти дүнья б...
Қашсаң жолың болсын дәўран.

Kelgen soń adam kóp jasqa,
Qartayǵan soń bolar qáste,
Gúńgirtlenip kózli jasta,
Bul basımnan óttiń dáwran.

Tınlań qurbı hám qurdasım,
Jigirma bes ótti jasım,
Qayǵıda boldı bul basım,
Ármanlıqta óttiń dáwran.

Meni saldıń janǵan otqa,
Ókpemdi hám qoyıp partqa,
Kem tasladıń bizdi artqa,
Sóytip bizden óttiń dáwran.

Bay bolmadım jıynap maldı,
Biy bolmadım salıp bardı,
Bári mennen arta qaldı,
Keregi joq onday dáwran.

Bayǵa bardıń, baxıt boldıń,
Sınbaytuǵın saxıt boldıń,
Jónin taptıń qıysıq joldıń
Hárkimlerge kettiń dáwran.

Jarlı adamǵa jantaspaysań,
Kópke deyin uyalmaysań,
Qalay-aw dep oylanbaysań,
Bizden qashıp júrseń dáwran.

Astımda joq kólik eshek,
Tósengenim topıraq, kesek,
Malı joqtı ettiń ósek,
Kúlki ettiń bizdi dáwran.

Ata-anama kelmediń,
Bizge mal-haldı bermediń,
Kózlerdiń jasın kórmediń,
Bul basımnan óttiń dáwran.

Endi maǵan keregiń joq,
Júregimnen ótkende oq,
Basımnan ótti dúnya b...
Qashsań jolıń bolsın dáwran.