Табанымды тас қопарып,
Түсерме деп сазанлар,
Салдым сени көлге апарып,
Қайнарма деп қазанлар.

Қарап көрсем бүгин барып,
Сазан түўе шабақ та жоқ.
Қара суўды келдим жарып,
Емес мениң қарыным тоқ.

Сени салып қара суўға,
Ҳеш бир пайда таппадым,
Оқты атып ушқан қусқа,
Оны да ҳеш жарытпадым.

Әрманым көп кеўлимде,
Сазан балық түспеди,
Қайыстырды қайғы мениң,
Ҳеш бир исим өнбеди.

Бизиң талап келиспеди,
Қанша ғайрат салсамда,
Илгерилеп ис өнбеди,
Мудам таққа турсамда...

Не болғаны талабыма,
Қыр шығады удайы,
Жалғыз балық болмаса да,
Ығбалыма шыдайын.

Қайығым жоқ, жекен салда,
Таянаман таяўды,
Басқа нәрсе жоқ ғой қолда,
Салмасам да таяўды.

Tabanımdı tas qoparıp,
Túserme dep sazanlar,
Saldım seni kólge aparıp,
Qaynarma dep qazanlar.

Qarap kórsem búgin barıp,
Sazan túwe shabaq ta joq.
Qara suwdı keldim jarıp,
Emes meniń qarınım toq.

Seni salıp qara suwǵa,
Hesh bir payda tappadım,
Oqtı atıp ushqan qusqa,
Onı da hesh jarıtpadım.

Ármanım kóp kewlimde,
Sazan balıq túspedi,
Qayıstırdı qayǵı meniń,
Hesh bir isim ónbedi.

Biziń talap kelispedi,
Qansha ǵayrat salsamda,
Ílgerilep is ónbedi,
Mudam taqqa tursamda...

Ne bolǵanı talabıma,
Qır shıǵadı udayı,
Jalǵız balıq bolmasa da,
Iǵbalıma shıdayın.

Qayıǵım joq, jeken salda,
Tayanaman tayawdı,
Basqa nárse joq ǵoy qolda,
Salmasam da tayawdı.