Бармағыңды бүгесең,
Адамды жөнсиз сөгесең,
Бермести жаман көресең,
Қара берман, сөк санарым,

Сөкти санайсаң биреўлеп,
Көзиңниң алды гиреўлеп,
Қудай мал берди сүриўлеп,
Усы пығлың, сөк санарым.

Сонша малың бар қорада,
Түйең жайылар саҳрада,
Көп дәниң жатыр урада.
Пығлың кеткен, сөк санарым.

Қарыз сорап келдим саған,
Не исиң бар дедиң маған,
Антлар иштиң сөйлеп жалған,
Пығлыңнан тап, сөк санарым.

Қатыныңнын аты Әнар,
Ол бийшара көпти аяр,
Ҳарамы ҳаслың, сөк санар,
Буйырмас бул жыйған малың.

Анаў қойың өрис-өрис,
Сыйырың жүр гирес-гирес.
Түйе деген ол бир ырыс,
Ҳәммеси буйырмас саған.

Анаў атларың үйирде,
Қос өгизлериң егинде,
Жылайсаң ылақ өлгенде,
Пығлың жаман, сөк санарым.

Әзирейли жаныңды алар,
Алқымыңды кеспей сояр,
Жыйғаның артыңда қалар,
Бул пығлыңнан, сөк санарым.

Сөк санар – сықмар, шығымсыз дегени (таярлаўшылар)

Barmaǵıńdı búgeseń,
Adamdı jónsiz sógeseń,
Bermesti jaman kóreseń,
Qara berman, sók sanarım,

Sókti sanaysań birewlep,
Kózińniń aldı girewlep,
Quday mal berdi súriwlep,
Usı pıǵlıń, sók sanarım.

Sonsha malıń bar qorada,
Túyeń jayılar sahrada,
Kóp dániń jatır urada.
Pıǵlıń ketken, sók sanarım.

Qarız sorap keldim saǵan,
Ne isiń bar dediń maǵan,
Antlar ishtiń sóylep jalǵan,
Pıǵlıńnan tap, sók sanarım.

Qatınıńnın atı Ánar,
Ol biyshara kópti ayar,
Haramı haslıń, sók sanar,
Buyırmas bul jıyǵan malıń.

Anaw qoyıń óris-óris,
Sıyırıń júr gires-gires.
Túye degen ol bir ırıs,
Hámmesi buyırmas saǵan.

Anaw atlarıń úyirde,
Qos ógizleriń eginde,
Jılaysań ılaq ólgende,
Pıǵlıń jaman, sók sanarım.

Ázireyli janıńdı alar,
Alqımıńdı kespey soyar,
Jıyǵanıń artıńda qalar,
Bul pıǵlıńnan, sók sanarım.

Sók sanar – sıqmar, shıǵımsız degeni (tayarlawshılar)