Ингалайды, шырқырайды,
Жубанбайды жыласа,
Анасынан сүт шықпайды,
Қанша ықлас қылса да.

Анасы аш, балам жатыр,
Жубанбастан шырқырап.
Анасы да қайғыда отыр,
Қапталында зар жылап.

Балам мениң шарға болды,
Анасынан сүт шықпай,
Ашық болып гүлдей солды,
Адым атып жүре алмай.

Мениң балам бала еди,
Душпанынан өш алғандай,
Мениң балам сондай еди,
Жаўға ойран салғандай.

Мениң балам,
Кейниме ере алмай,
Мен де оны
Аяйман да жылайман,
Жүрмен өзим жақтылықты көре алмай.

Мениң балам,
Өлди еки жасында,
Көне алмадым оған шыдап,
Көп жыладым қасында.

Мениң балам –
Өлип кетти,
Дедигине жете алмай,
Өмир жасын қысқа етти,
Адым атып жүре алмай.

Мениң балам саў болғанда –
Жүрер еди сайранлап,
Өлим оғы тиймегенде –
Гүресер еди бел байлап.

Мениң балам –
Гүлдей солды жасынан,
Ис ақыры сондай болды.
Өтти бул да басымнан.

Íngalaydı, shırqıraydı,
Jubanbaydı jılasa,
Anasınan sút shıqpaydı,
Qansha ıqlas qılsa da.

Anası ash, balam jatır,
Jubanbastan shırqırap.
Anası da qayǵıda otır,
Qaptalında zar jılap.

Balam meniń sharǵa boldı,
Anasınan sút shıqpay,
Ashıq bolıp gúldey soldı,
Adım atıp júre almay.

Meniń balam bala edi,
Dushpanınan ósh alǵanday,
Meniń balam sonday edi,
Jawǵa oyran salǵanday.

Meniń balam,
Keynime ere almay,
Men de onı
Ayayman da jılayman,
Júrmen ózim jaqtılıqtı kóre almay.

Meniń balam,
Óldi eki jasında,
Kóne almadım oǵan shıdap,
Kóp jıladım qasında.

Meniń balam –
Ólip ketti,
Dedigine jete almay,
Ómir jasın qısqa etti,
Adım atıp júre almay.

Meniń balam saw bolǵanda –
Júrer edi sayranlap,
Ólim oǵı tiymegende –
Gúreser edi bel baylap.

Meniń balam –
Gúldey soldı jasınan,
Ís aqırı sonday boldı.
Ótti bul da basımnan.