Қарап турсаң бул заманға,
Сондай жайсыз шыбын жанға,
Жылға-сайлар толды қанға,
Әлеўмет бул қандай заман?

Жылаған көп, өксиген көп,
Ҳәм ашлықтан ийт етин жеп,
Бир жутымға етеди еп,
Қайғы камал болды заман.

Жесир қатын, жетим уллар,
Тентиреп ботадай бозлар,
Шабаққа сатылды қызлар,
Ҳәсирет-қайғы болды заман.

Халық посып мәканынан,
Ҳәм айрылып үй-жайынан,
Табалмады бир тислем нан,
Қайғы қырғын болды заман.

Малы барға ҳеш гәп емес,
Малсыз оларға тең емес,
Бул күнимиз күн емес,
Қара түнек болды заман.

Ата баладан айрылып,
Қанат-қуйрықтан майрылып,
Тамақ табалмай сарсылып,
Жүрген қайғы болды заман.

Бала-шағалар жалаңаш,
Пулсыз, тағы қарыны аш,
Көзинен ағып қанлы яш,
Қыяметлик болды, заман.

Егинлерди суўық урды,
Ерте бастан суў қурыды,
Кимлер асып кетти қырды,
Қыян-кески болды, заман.

Суў ақпады, жаплар ылай,
Ем-дәри болды, басалай,
Көз көр болды жылай-жылай,
Аш-әптада болды, заман.

Аштан өлгенлер көп болды,
Өликке жылға топ болды.
Ашлыққа аўарыў жуп болды,
Қыян-кески болды, заман.

Qarap tursań bul zamanǵa,
Sonday jaysız shıbın janǵa,
Jılǵa-saylar toldı qanǵa,
Álewmet bul qanday zaman?

Jılaǵan kóp, óksigen kóp,
Hám ashlıqtan iyt etin jep,
Bir jutımǵa etedi ep,
Qayǵı kamal boldı zaman.

Jesir qatın, jetim ullar,
Tentirep botaday bozlar,
Shabaqqa satıldı qızlar,
Hásiret-qayǵı boldı zaman.

Xalıq posıp mákanınan,
Hám ayrılıp úy-jayınan,
Tabalmadı bir tislem nan,
Qayǵı qırǵın boldı zaman.

Malı barǵa hesh gáp emes,
Malsız olarǵa teń emes,
Bul kúnimiz kún emes,
Qara túnek boldı zaman.

Ata baladan ayrılıp,
Qanat-quyrıqtan mayrılıp,
Tamaq tabalmay sarsılıp,
Júrgen qayǵı boldı zaman.

Bala-shaǵalar jalańash,
Pulsız, taǵı qarını ash,
Kózinen aǵıp qanlı yash,
Qıyametlik boldı, zaman.

Eginlerdi suwıq urdı,
Erte bastan suw qurıdı,
Kimler asıp ketti qırdı,
Qıyan-keski boldı, zaman.

Suw aqpadı, japlar ılay,
Em-dári boldı, basalay,
Kóz kór boldı jılay-jılay,
Ash-áptada boldı, zaman.

Ashtan ólgenler kóp boldı,
Ólikke jılǵa top boldı.
Ashlıqqa awarıw jup boldı,
Qıyan-keski boldı, zaman.