Шықтым дүньяға не көрдим,
Жасап дүньяда не болдым?
Қайғы-қапада жер болдым,
Қысым болды шыбын жанға.

Жасым жетти, исим питти,
Аз дәўран басымнан өтти,
Ғаррылық камалы жетти,
Енди бул ўақта, не болдым?

Тоным диземе жетпеди,
Жыламай күним өтпеди,
Ойлаған ойым питпеди,
Мине қартайдым, не болдым?

Көзим тынды гиреўленип,
Ғаррылық нышаны енип,
Қабырғамды қайғы сөгип,
Қайғы қаплады, не болдым?

Анадан жетим қалыппан.
Қаңғырған жетим болыппан,
Азғырды мени көп душпан,
Хорлықта ҳәзир, не болдым?

Сақал-шашларым ағарды,
Ақша жүзлерим сарғайды,
Қол-аяғым салдырайды,
Ойланып ҳәзир, не болдым?

Қуўатым кетип белимнен,
Хабар келип тур өлимнен.
Жақын болып қайғы билен,
Қартайып ҳәзир, не болдым?

Бағсыз жерлерде сайрадым,
Ҳәр нәрселерди ойладым,
Қайғыға тисти қайрадым.
Ақыры, халқым, не болдым?

Жасым жетпей питти исим,
Нәрсе қалмай түсти тисим,
Жоқшылықтан кетти есим,
Шығып дүньяға, не болдым?

Shıqtım dúnyaǵa ne kórdim,
Jasap dúnyada ne boldım?
Qayǵı-qapada jer boldım,
Qısım boldı shıbın janǵa.

Jasım jetti, isim pitti,
Az dáwran basımnan ótti,
Ǵarrılıq kamalı jetti,
Endi bul waqta, ne boldım?

Tonım dizeme jetpedi,
Jılamay kúnim ótpedi,
Oylaǵan oyım pitpedi,
Mine qartaydım, ne boldım?

Kózim tındı girewlenip,
Ǵarrılıq nıshanı enip,
Qabırǵamdı qayǵı sógip,
Qayǵı qapladı, ne boldım?

Anadan jetim qalıppan.
Qańǵırǵan jetim bolıppan,
Azǵırdı meni kóp dushpan,
Xorlıqta házir, ne boldım?

Saqal-shashlarım aǵardı,
Aqsha júzlerim sarǵaydı,
Qol-ayaǵım saldıraydı,
Oylanıp házir, ne boldım?

Quwatım ketip belimnen,
Xabar kelip tur ólimnen.
Jaqın bolıp qayǵı bilen,
Qartayıp házir, ne boldım?

Baǵsız jerlerde sayradım,
Hár nárselerdi oyladım,
Qayǵıǵa tisti qayradım.
Aqırı, xalqım, ne boldım?

Jasım jetpey pitti isim,
Nárse qalmay tústi tisim,
Joqshılıqtan ketti esim,
Shıǵıp dúnyaǵa, ne boldım?