Сөзимди тыңлап халайық,
Усыма бизге ылайық?
Ортаға сөзди салайық,
Әрман билен жарымадым.

Бул дүньяда өтер-кетер.
Өтпесе бир нәўбет жетер,
Мендей болған әрманда өтер,
Өмир зинҳар жарымадым.

Сөзимди жәрия әйлесем,
Қуры далада қайғы жесем,
Дин Хорезмди излесем,
Ашна таўып жарымадым.

Күнхожа боп атым кешти,
Дүньяда еңбегим ешти,
Бир жәм етсем ақыл-ҳуўышты,
Жалғаншыда жарымадым.

Дүньяның тарттым азабыны,
Душпан тыңламас сөзимни,
Думан қаплап жер жүзини,
Жақтылыққа жарымадым.

Балаларым отыр жалаңаш,
Күйик пенен ағарды шаш,
Атамнан қалған жүн шанаш,
Шанашқа да жарымадым.

Үлкен асым тыран шабақ,
Салып жегеним жекен табақ,
Таба алмадым басқа тамақ,
Бир жутымға жарымадым.

Қыппа жалаңаш сүйгеним,
Дүньядан сөйтип күйгеним,
Болмады мениң дегеним,
Бир жутымға жарымадым.

Жетпей тапқаным жутымға,
Қамысты жақтым отынға,
Түўесилмес бул ҳалыма,
Раўа болып жарымадым.

Болмады жаманда парық,
Аяғымда жаман шарық,
Астымдағы атым арық,
Көликке де жарымадым.

Мен сорлының иши дәртли,
Не қылайын мен қүдиретти?
Биздейлерге бурмас бетти,
Соның ушын жарымадым.

Сөзлерим пәтиўасыз болды,
Сөйтип ишим дәртке толды,
Найсапларда дуўры жолды,
Тутпаған соң жарымадым.

Мақтамадым аталықты,
Сөйтип еттим хаталықты,
Ол ҳәм етти жаманлықты,
Сол себептен жарымадым.

Атым мениң ҳалыққа мәлим,
Сорлылықтан жетпес ҳалым,
Бул сөзим дүньяға мәлим,
Ақырет билен жарымадым.

Sózimdi tıńlap xalayıq,
Usıma bizge ılayıq?
Ortaǵa sózdi salayıq,
Árman bilen jarımadım.

Bul dúnyada óter-keter.
Ótpese bir náwbet jeter,
Mendey bolǵan ármanda óter,
Ómir zinhar jarımadım.

Sózimdi járiya áylesem,
Qurı dalada qayǵı jesem,
Din Xorezmdi izlesem,
Ashna tawıp jarımadım.

Kúnxoja bop atım keshti,
Dúnyada eńbegim eshti,
Bir jám etsem aqıl-huwıshtı,
Jalǵanshıda jarımadım.

Dúnyanıń tarttım azabını,
Dushpan tıńlamas sózimni,
Duman qaplap jer júzini,
Jaqtılıqqa jarımadım.

Balalarım otır jalańash,
Kúyik penen aǵardı shash,
Atamnan qalǵan jún shanash,
Shanashqa da jarımadım.

Úlken asım tıran shabaq,
Salıp jegenim jeken tabaq,
Taba almadım basqa tamaq,
Bir jutımǵa jarımadım.

Qıppa jalańash súygenim,
Dúnyadan sóytip kúygenim,
Bolmadı meniń degenim,
Bir jutımǵa jarımadım.

Jetpey tapqanım jutımǵa,
Qamıstı jaqtım otınǵa,
Túwesilmes bul halıma,
Rawa bolıp jarımadım.

Bolmadı jamanda parıq,
Ayaǵımda jaman sharıq,
Astımdaǵı atım arıq,
Kólikke de jarımadım.

Men sorlınıń ishi dártli,
Ne qılayın men qúdiretti?
Bizdeylerge burmas betti,
Sonıń ushın jarımadım.

Sózlerim pátiwasız boldı,
Sóytip ishim dártke toldı,
Naysaplarda duwrı joldı,
Tutpaǵan soń jarımadım.

Maqtamadım atalıqtı,
Sóytip ettim xatalıqtı,
Ol hám etti jamanlıqtı,
Sol sebepten jarımadım.

Atım meniń halıqqa málim,
Sorlılıqtan jetpes halım,
Bul sózim dúnyaǵa málim,
Aqıret bilen jarımadım.