Атасы Әбил кәтқуда, молла Тәжидур ағасы,
Зербарақ алтын қуйылмыш таққан аның сырғасы,
Кийгени жәннет ишик, қундыз тутылмыш яғасы,
Ҳайт-мереке, тойға шықса бәрше қыздың ағласы,
Бәршәдин ағла сениң ҳүсни жамалың, қыз Ораз.

Ғарға баласы ойнамас көлдеги қоңыр ғаз илән,
Отырышы мегземиш туғрыда қонған баз илән,
Қарсы алур мийман келсе шайы-сәўбет саз илән,
Көргенниң ышқыны алур нешше әлўан наз илән,
Бәршедин ағла сениң ҳүсни жамалың, қыз Ораз.

Алтын ҳәйкел, гүмис шытақ өңир моншақ таққаны,
Атадан ҳасыл туўыпдур, ҳәммелерге яққаны,
Айжамала мегземиш үйден керилип шыққаны,
Көкирегиңе ойлар салур қыя-қыя баққаны,
Бәршедин ағла сениқ ҳүсни жамалың, қыз Ораз.

Ҳәр йигит қалта жиберсе, толтырыплар шай салур,
Үстине келсе ғанийми, қайсы бириден тайсалур,
Әгәрки келсәләр меҳман, әлин қаўсырып қарсы алур,
Барыны меҳмандын аямай, дәсүрқанын кең жайур,
Бәршедин ағла, сениң ҳүсни жамалың, қыз Ораз.

Atası Ábil kátquda, molla Tájidur aǵası,
Zerbaraq altın quyılmısh taqqan anıń sırǵası,
Kiygeni jánnet ishik, qundız tutılmısh yaǵası,
Hayt-mereke, toyǵa shıqsa bárshe qızdıń aǵlası,
Bárshádin aǵla seniń húsni jamalıń, qız Oraz.

Ǵarǵa balası oynamas kóldegi qońır ǵaz ilán,
Otırıshı megzemish tuǵrıda qonǵan baz ilán,
Qarsı alur miyman kelse shayı-sáwbet saz ilán,
Kórgenniń ıshqını alur neshshe álwan naz ilán,
Bárshedin aǵla seniń húsni jamalıń, qız Oraz.

Altın háykel, gúmis shıtaq óńir monshaq taqqanı,
Atadan hasıl tuwıpdur, hámmelerge yaqqanı,
Ayjamala megzemish úyden kerilip shıqqanı,
Kókiregińe oylar salur qıya-qıya baqqanı,
Bárshedin aǵla seniq húsni jamalıń, qız Oraz.

Hár yigit qalta jiberse, toltırıplar shay salur,
Ústine kelse ǵaniymi, qaysı biriden taysalur,
Ágárki kelsálár mehman, álin qawsırıp qarsı alur,
Barını mehmandın ayamay, dásúrqanın keń jayur,
Bárshedin aǵla, seniń húsni jamalıń, qız Oraz.