Жағалтай елинен келген жанларым,
Әжекеңнин ахыў зары аман ба?
Бүлбиллер сайраған шәмен бағларым,
Бағ ишинде қызыл гүллер аман ба?

Арқыратып бедеў минип шыққаным,
Тазылар жуўыртып, кекмар шапқаным,
Кезиие көз түсип қаслар қаққаным,
Арғын түскен жана-жаным аман ба?

Қыпша белин, ақ жүзлерин қушпаға,
Ярдың қушағында шағлап йошпаға,
Умтылады пәрўаз етип ушпаға,
Бул жақты жаҳанда Гүлжан аман ба?

Күйгенимнен атын қойдым Гүлжан деп,
Пида болсын яр жолында бул жан деп,
Түнде аспанда ай, мәҳи шолпан деп,
Жүрген мениң сәўер ярым аман ба?

Ядымда тур яр қойнында жатқаным,
Палын сорып рәҳатке батқаным,
Дүньяның ләззетин излеп тапқаным,
Булжымас ўәделес ярым аман ба?

Ер жигиттин жарасығы яр деген,
Мерекеде көрип, "үйге бар" деген,
"Болып жүрмен саған аҳыў зар" деген,
Көңил берген қарийдарым аман ба?

Jaǵaltay elinen kelgen janlarım,
Ájekeńnin axıw zarı aman ba?
Búlbiller sayraǵan shámen baǵlarım,
Baǵ ishinde qızıl gúller aman ba?

Arqıratıp bedew minip shıqqanım,
Tazılar juwırtıp, kekmar shapqanım,
Keziie kóz túsip qaslar qaqqanım,
Arǵın túsken jana-janım aman ba?

Qıpsha belin, aq júzlerin qushpaǵa,
Yardıń qushaǵında shaǵlap yoshpaǵa,
Umtıladı párwaz etip ushpaǵa,
Bul jaqtı jahanda Gúljan aman ba?

Kúygenimnen atın qoydım Gúljan dep,
Pida bolsın yar jolında bul jan dep,
Túnde aspanda ay, máhi sholpan dep,
Júrgen meniń sáwer yarım aman ba?

Yadımda tur yar qoynında jatqanım,
Palın sorıp ráhatke batqanım,
Dúnyanıń lázzetin izlep tapqanım,
Buljımas wádeles yarım aman ba?

Er jigittin jarasıǵı yar degen,
Merekede kórip, "úyge bar" degen,
"Bolıp júrmen saǵan ahıw zar" degen,
Kóńil bergen qariydarım aman ba?