Қыя бақып менин жанымды алып,
Йүз мын жилўа менен шығар гөззаллар,
Йүрегиме ада болмас от йақып,
Мениң жаным отқа йақар гөззаллар.

Тырнадек отырып, сонадәк йүрген,
Йүзмың жилўа менен қабағын керген,
Шашларына лағлы мәржан өткерген.
Мын түмен наз билән бақар гөззаллар.

Қара көзи гәўҳар киби жаўдырап,
Кийген тоны көрген сайын жалтырап,
Өңир моншақ, ҳәйкел тағып сылдырап,
Сүзип қәлем қасын қақар гөззаллар.

Ҳайтта, мерекеде жигит жыйылса,
Күни-түни бирдейин тамаша болса,
Сол заманда қызлар саллана келсе,
Жанын ашып, көзин тикер гөззаллар.

Яр сарайы дәўран он төрт яшында,
Қызлар йүрер ерди дигре-дашында,
Айтар Зийўар яр саўдасы башында,
Айттым сүйгенимнен буны гөззаллар.

Qıya baqıp menin janımdı alıp,
Yúz mın jilwa menen shıǵar gózzallar,
Yúregime ada bolmas ot yaqıp,
Meniń janım otqa yaqar gózzallar.

Tırnadek otırıp, sonadák yúrgen,
Yúzmıń jilwa menen qabaǵın kergen,
Shashlarına laǵlı márjan ótkergen.
Mın túmen naz bilán baqar gózzallar.

Qara kózi gáwhar kibi jawdırap,
Kiygen tonı kórgen sayın jaltırap,
Óńir monshaq, háykel taǵıp sıldırap,
Súzip qálem qasın qaqar gózzallar.

Haytta, merekede jigit jıyılsa,
Kúni-túni birdeyin tamasha bolsa,
Sol zamanda qızlar sallana kelse,
Janın ashıp, kózin tiker gózzallar.

Yar sarayı dáwran on tórt yashında,
Qızlar yúrer erdi digre-dashında,
Aytar Ziywar yar sawdası bashında,
Ayttım súygenimnen bunı gózzallar.