Беглер, тәрип етсем Қатша перийди,
Қалем қаслы, қара көзлери бардур.
Мын санлы садаға басқан изийни,
Мисли аптаб киби йузлери бардур.

Көрсеңиз бир пәрий наз билән бақар,
Наз етсе ашықтың жаныны яқар,
Сол көзини қымып, оң қасын қақар,
Жүз ҳиссә жилўалы назлары бардур.

Йүзин бир көргенниң ақлы болар лал.
Қөз жасыны төкер, тынмай маҳы-сал,
Жийди набат, ләби қантыў әсел бал,
Ләпте каса толы паллары бардур.

Енди сениң тәрийпиңди дийейин.
Қулақ салып, тыңласаңыз, қыз Қатша,
Өз ўаспынды мен өзиңе дийейин,
Пехим етип аңла буны, қыз Қатша.

Әлемниң жүзинде бир сулыў болдың,
Дәрья киби тасып, толып мәўиж урдың,
Ақырында қатарыңнан кем болдың,
Қәдириң кетти тең душыңа, қыз Қатша.

Жалбарынып бир жигитти тапқансыз,
Үстлерине жипек-сарпай жапқансыз,
Жүзлеринен қайта-қайта өпкенсиз
Ол ҳәм айра түсти сеннен, қыз Қатша.

Begler, tárip etsem Qatsha periydi,
Qalem qaslı, qara kózleri bardur.
Mın sanlı sadaǵa basqan iziyni,
Misli aptab kibi yuzleri bardur.

Kórseńiz bir páriy naz bilán baqar,
Naz etse ashıqtıń janını yaqar,
Sol kózini qımıp, oń qasın qaqar,
Júz hissá jilwalı nazları bardur.

Yúzin bir kórgenniń aqlı bolar lal.
Qóz jasını tóker, tınmay mahı-sal,
Jiydi nabat, lábi qantıw ásel bal,
Lápte kasa tolı palları bardur.

Endi seniń táriypińdi diyeyin.
Qulaq salıp, tıńlasańız, qız Qatsha,
Óz waspındı men ózińe diyeyin,
Pexim etip ańla bunı, qız Qatsha.

Álemniń júzinde bir sulıw boldıń,
Dárya kibi tasıp, tolıp máwij urdıń,
Aqırında qatarıńnan kem boldıń,
Qádiriń ketti teń dushıńa, qız Qatsha.

Jalbarınıp bir jigitti tapqansız,
Ústlerine jipek-sarpay japqansız,
Júzlerinen qayta-qayta ópkensiz
Ol hám ayra tústi sennen, qız Qatsha.