Ҳаслы бузық сөзди билмес,
Нәсиятқа көңил бермес
Айтқаның қулаққа кирмес,
Аржағында болмағанша.

Жақсыларды қәдирлемес,
Ҳеш нәрсени зейни илмес,
Силтеген жолына жүрмес,
Есесине қуймағанша.

Қәдирин билмес туўған елдиң,
Парқын билмес алтын-зердиң,
Қәдирин билмес нағыз ердиң,
Басына ис түспегенше.

Көркемлерге көңли толмас,
Қатарына нәзер салмас,
Яқшы ярдың қәдири болмас,
Бир ямана түспегенше.

Қуўанып көңли жай болмас,
Жай болса ҳәм қолай болмас,
Асырап алған перзент болмас,
Қамарыңнан өнбегенше.

Баҳасы жоқ ҳасыл заттың,
Парқы кәндур азаматтың,
Қәдири болмас жақсы аттың,
Пияда жол аспағанша.

Қәдирин бил барлық жанның,
Маңлай терден өнген дәнниң.
Қәдирин билмес астың-нанның,
Бес күн зарын тартпағанша.

Haslı buzıq sózdi bilmes,
Násiyatqa kóńil bermes
Aytqanıń qulaqqa kirmes,
Arjaǵında bolmaǵansha.

Jaqsılardı qádirlemes,
Hesh nárseni zeyni ilmes,
Siltegen jolına júrmes,
Esesine quymaǵansha.

Qádirin bilmes tuwǵan eldiń,
Parqın bilmes altın-zerdiń,
Qádirin bilmes naǵız erdiń,
Basına is túspegenshe.

Kórkemlerge kóńli tolmas,
Qatarına názer salmas,
Yaqshı yardıń qádiri bolmas,
Bir yamana túspegenshe.

Quwanıp kóńli jay bolmas,
Jay bolsa hám qolay bolmas,
Asırap alǵan perzent bolmas,
Qamarıńnan ónbegenshe.

Bahası joq hasıl zattıń,
Parqı kándur azamattıń,
Qádiri bolmas jaqsı attıń,
Piyada jol aspaǵansha.

Qádirin bil barlıq jannıń,
Mańlay terden óngen dánniń.
Qádirin bilmes astıń-nannıń,
Bes kún zarın tartpaǵansha.