Бәршә адам теңдей емес,
Сен қоймағыл йуртқа әбес,
Биреў ақыл, биреў ғапыл,
Бәршә бирдей болған емес.

Қудаға қас илмиғайып,
Сөз айттың бизге әжайып,
Бенде йоқдур ҳеш айыпсыз,
Бир қудада жоқдур айып.

Сөзиң найза сипет өтер,
Өз башыңа сөзиң жетер,
Қанша өзиң билгиш болсаң,
Бир билмеслик неге өтер.

Ол әжелин көрип болмас,
Алдын болжап билип болмас,
Бәршә мақлуқ бирдей емес,
Билмеске ыза берип болмас.

Биреўде бар питкен ақыл,
Жуқпай кетер сүрткен ақыл,
Ойдағыны билип болмас,
Бурынғыдан қалған нақыл.

Төрт тәрепиң қубла емес,
Сен қылмағыл йуртқа әбес,
Биреў ақыл, биреў ғапыл,
Бәрше бирдей болған емес.

Сөзиңниң ҳаслын ес билипсең,
Басқаны нәкәс билипсең,
Сен етмегил тәкаббирлик,
Йуртны өзиңнен пәс билипсең.

Bárshá adam teńdey emes,
Sen qoymaǵıl yurtqa ábes,
Birew aqıl, birew ǵapıl,
Bárshá birdey bolǵan emes.

Qudaǵa qas ilmiǵayıp,
Sóz ayttıń bizge ájayıp,
Bende yoqdur hesh ayıpsız,
Bir qudada joqdur ayıp.

Sóziń nayza sipet óter,
Óz bashıńa sóziń jeter,
Qansha óziń bilgish bolsań,
Bir bilmeslik nege óter.

Ol ájelin kórip bolmas,
Aldın boljap bilip bolmas,
Bárshá maqluq birdey emes,
Bilmeske ıza berip bolmas.

Birewde bar pitken aqıl,
Juqpay keter súrtken aqıl,
Oydaǵını bilip bolmas,
Burınǵıdan qalǵan naqıl.

Tórt tárepiń qubla emes,
Sen qılmaǵıl yurtqa ábes,
Birew aqıl, birew ǵapıl,
Bárshe birdey bolǵan emes.

Sózińniń haslın es bilipseń,
Basqanı nákás bilipseń,
Sen etmegil tákabbirlik,
Yurtnı ózińnen pás bilipseń.