Қыял етсем мениң көнлим,
Ертлеўдеги атқа мегзер,
Бир достыңнан кеўлиң қалса,
Ғәлет жазған хатқа мегзер.

Халайықлар, ойлап қара,
Татыўласар кем-кем ара,
Дус болсаңыз яқшы яра,
Өмириң гүлистана мегзер.

Ишиң толар намыс-арға,
Кеўил бермес рузигарға,
Исиң түссе пейли тарға,
Қәпеске түскене мегзер.

Жипек минез шын биймәлел,
Сөзлери шекер, ләбинде пал,
Қолыңа түссе бир гөззал,
Өмириң хошхала мегзер.

Ишиң толса әрман-шерге,
Кеўлиң мегзер қара жерге,
Жаман қатын жақсы ерге.
Таўсылмас дөҳметке мегзер.

Хош жигит болса ҳәмрайың,
Не қайғың бар, не пәрўайың,
Түлистан кеўил сарайың,
Қыс күнлериң жазға мегзер.

Пуллы болса кәспи-кәриң,
Душпанлардан өнер арың,
Ҳәмме сениң досың-ярың,
Төрт жағың қублаға мегзер.

Келтирсем ақыл-ойымды,
Дүньяның жоқдур тойымы,
Азада қыздың қойыны,
Жәннеттиң бағына мегзер.

Абадандур оңың-солың,
Жетеди ҳәр жерге қолың,
Болса жеделли мәрт улың,
Кеўлиң бәлент таўға мегзер.

Алыс-жақынды билмесе,
Кейнинде көзге илмесе.
Тийисли ҳақыңды бермесе,
Ағайының жаўға мегзер.

Сыр шашпас адам данасы,
Орынланар сөз сарасы,
Жаман қонсының арасы,
Күнде жәнжел-даўға мегзер.

Көкке жетер шеккен налаң,
Ойран болар жигер, санаң,
Ахмақ болса туўған балаң,
Өмириң зимистана мегзер.

Халайықлар, қулақ салың,
Буйырғаны мүлки малың,
Кеўлиңнен шықса ҳаялың.
Беҳиш ғулманына мегзер.

Туўысқаның болса пасық.
Жөн билмеген жүдә жасық,
Алыс-берис жоқ сыйласық,
Туўысқаның жатқа мегзер.

Халайыққа көз салмаса,
Ағайинди танымаса,
Балаң тилиңди алмаса,
Ишиң жанған отқа мегзер.

Жақсыда ашыў, кек болмас,
Бир яманлық яддан қалмас,
Ҳешким аяп нәзер салмас,
Ишиң жанған отқа мегзер.

Халыққа машқул тасқын дәўлет,
Ҳеш кимге болмаған үлпет,
Етпеген қайыр-сақаўат,
Мийўасыз бир талға мегзер.

Арасатшыл шын хунаба,
Етпесе ҳаққыңа дуўа.
Мәселе айтпаған улама,
Суўы жоқ арнага мегзер.

Ийемен деп уллы атаққа,
Аты белгили елатқа,
Жайылмаса сөзи халыққа,
Шайыр гөне тамға мегзер.

Адам улы – бәри адам,
Ҳаллас урғыл, кеўлим шадлан,
Пазийлет билмеген надан,
Төрт аяқлы малға мегзер.

Qıyal etsem meniń kónlim,
Ertlewdegi atqa megzer,
Bir dostıńnan kewliń qalsa,
Ǵálet jazǵan xatqa megzer.

Xalayıqlar, oylap qara,
Tatıwlasar kem-kem ara,
Dus bolsańız yaqshı yara,
Ómiriń gúlistana megzer.

Íshiń tolar namıs-arǵa,
Kewil bermes ruzigarǵa,
Ísiń tússe peyli tarǵa,
Qápeske túskene megzer.

Jipek minez shın biymálel,
Sózleri sheker, lábinde pal,
Qolıńa tússe bir gózzal,
Ómiriń xoshxala megzer.

Íshiń tolsa árman-sherge,
Kewliń megzer qara jerge,
Jaman qatın jaqsı erge.
Tawsılmas dóhmetke megzer.

Xosh jigit bolsa hámrayıń,
Ne qayǵıń bar, ne párwayıń,
Túlistan kewil sarayıń,
Qıs kúnleriń jazǵa megzer.

Pullı bolsa káspi-káriń,
Dushpanlardan óner arıń,
Hámme seniń dosıń-yarıń,
Tórt jaǵıń qublaǵa megzer.

Keltirsem aqıl-oyımdı,
Dúnyanıń joqdur toyımı,
Azada qızdıń qoyını,
Jánnettiń baǵına megzer.

Abadandur ońıń-solıń,
Jetedi hár jerge qolıń,
Bolsa jedelli márt ulıń,
Kewliń bálent tawǵa megzer.

Alıs-jaqındı bilmese,
Keyninde kózge ilmese.
Tiyisli haqıńdı bermese,
Aǵayınıń jawǵa megzer.

Sır shashpas adam danası,
Orınlanar sóz sarası,
Jaman qonsınıń arası,
Kúnde jánjel-dawǵa megzer.

Kókke jeter shekken nalań,
Oyran bolar jiger, sanań,
Axmaq bolsa tuwǵan balań,
Ómiriń zimistana megzer.

Xalayıqlar, qulaq salıń,
Buyırǵanı múlki malıń,
Kewlińnen shıqsa hayalıń.
Behish ǵulmanına megzer.

Tuwısqanıń bolsa pasıq.
Jón bilmegen júdá jasıq,
Alıs-beris joq sıylasıq,
Tuwısqanıń jatqa megzer.

Xalayıqqa kóz salmasa,
Aǵayindi tanımasa,
Balań tilińdi almasa,
Íshiń janǵan otqa megzer.

Jaqsıda ashıw, kek bolmas,
Bir yamanlıq yaddan qalmas,
Heshkim ayap názer salmas,
Íshiń janǵan otqa megzer.

Xalıqqa mashqul tasqın dáwlet,
Hesh kimge bolmaǵan úlpet,
Etpegen qayır-saqawat,
Miywasız bir talǵa megzer.

Arasatshıl shın xunaba,
Etpese haqqıńa duwa.
Másele aytpaǵan ulama,
Suwı joq arnaga megzer.

Íyemen dep ullı ataqqa,
Atı belgili elatqa,
Jayılmasa sózi xalıqqa,
Shayır góne tamǵa megzer.

Adam ulı – bári adam,
Hallas urǵıl, kewlim shadlan,
Paziylet bilmegen nadan,
Tórt ayaqlı malǵa megzer.