^Гүлзада –
Кетермен дегели болды бирталай,
Соннан берли ақтарылды сыр талай,
Ақыр бүгин жолға шықтын бул қалай?
Сапар еткен сәўер ярым, бар енди.

^Әжинияз –
Қыйланба қостарым, енди кетермен,
Басқа түссе кетпесликке нетермен,
Гүзде кетсем, келер жазда жетермен,
Жылай бермей-ақ қой жуптым, қал енди.

^Гүлзада –
Кетсең де қостарым, кеўил суўытпа,
Жазға жетпей айланагөр жуўықта,
Нағметулла, Ҳүрзаданы умытпа,
Алла ярың болсын, жаным, бар енди.

^Әжинияз –
Мәкан етип жатқан адам даланы,
Умытар ма үйде қалған баланы,
Умытар деп бизге қойма гүнаны,
Айтқан сөзлериме қулақ сал енди.

^Гүлзада –
Жаным саған неге гүна қояйын,
Наҳақ гүна қойсам ҳақтан табайын,
Кеткениңнен баслап күнди санайын,
Жолға жалтаңлатқан жаным, бар енди.

^Әжинияз –
Жылама да, жолыма да қарама,
Душпанға сыр берип, мени сорама,
Көз қулақ бол қызым менен балама,
Ул-қыздың анасы ярым, қал енди.

^Гүлзада –
Қолда қалған улың менен қызың бар,
Ул-қызыңа хош мулақат сөзиң бар,
Қостарыңа қарамаған гезиң бар,
Хош, ашыўлы арысланым, бар енди.

^Әжинияз –
Ер жетпей-ақ ес ақылдан бос қалды,
Улым-қызым екеўи де жас қалды,
Қуўатсыз аўқатсыз, қарны аш қалды,
Үйимниң ийеси ярым, қал енди.

^Гүлзада –
Мениңдей муңлыны жылатып изде,
Кетип баратырсаң қалдырып изге,
Жазында келегөр айланбай гүзге,
Жолыңа қылайын пидә жан енди.

^Әжинияз –
Гүзден бурын бир келермен айланып,
Қалмаса ояқта қолым байланып,
Мениң кеткениме жүрме қыйналып,
Қапа болма қәўендерим, қал енди.

^Гүлзада –
Кеткениңе неге болайын қапа,
Елде көп ағайин қарындас апа,
Егленип өзинди қылма бийўапа,
Сапар еткен сәўер ярым, бар енди,

^Әжинияз –
Сәл жерде басымды салдым сапарға,
Кетти деп айтарсан молла Жапарға,
Ҳүрзаданы жат жерлерге апарма,
Мениң берген нәсиятым ал енди,

^Гүлзада –
Бар машқала қарап турса ҳаялға,
Ҳаялың дөнбейме түрли қыялға,
Айтып кет көңлиңди меннен уялма,
Қуда қосқан қарыйдарым, бар енди.

^Әжинияз –
Гүзде кетип жаз айында келмесем,
Тапқан-тергенимди әкеп бермесем,
Алты айда ақ жүзиңди көрмесем,
Дүнья бизге алақаннан тар енди.

^Gúlzada –
Ketermen degeli boldı birtalay,
Sonnan berli aqtarıldı sır talay,
Aqır búgin jolǵa shıqtın bul qalay?
Sapar etken sáwer yarım, bar endi.

^Ájiniyaz –
Qıylanba qostarım, endi ketermen,
Basqa tússe ketpeslikke netermen,
Gúzde ketsem, keler jazda jetermen,
Jılay bermey-aq qoy juptım, qal endi.

^Gúlzada –
Ketseń de qostarım, kewil suwıtpa,
Jazǵa jetpey aylanagór juwıqta,
Naǵmetulla, Húrzadanı umıtpa,
Alla yarıń bolsın, janım, bar endi.

^Ájiniyaz –
Mákan etip jatqan adam dalanı,
Umıtar ma úyde qalǵan balanı,
Umıtar dep bizge qoyma gúnanı,
Aytqan sózlerime qulaq sal endi.

^Gúlzada –
Janım saǵan nege gúna qoyayın,
Nahaq gúna qoysam haqtan tabayın,
Ketkenińnen baslap kúndi sanayın,
Jolǵa jaltańlatqan janım, bar endi.

^Ájiniyaz –
Jılama da, jolıma da qarama,
Dushpanǵa sır berip, meni sorama,
Kóz qulaq bol qızım menen balama,
Ul-qızdıń anası yarım, qal endi.

^Gúlzada –
Qolda qalǵan ulıń menen qızıń bar,
Ul-qızıńa xosh mulaqat sóziń bar,
Qostarıńa qaramaǵan geziń bar,
Xosh, ashıwlı arıslanım, bar endi.

^Ájiniyaz –
Er jetpey-aq es aqıldan bos qaldı,
Ulım-qızım ekewi de jas qaldı,
Quwatsız awqatsız, qarnı ash qaldı,
Úyimniń iyesi yarım, qal endi.

^Gúlzada –
Menińdey muńlını jılatıp izde,
Ketip baratırsań qaldırıp izge,
Jazında kelegór aylanbay gúzge,
Jolıńa qılayın pidá jan endi.

^Ájiniyaz –
Gúzden burın bir kelermen aylanıp,
Qalmasa oyaqta qolım baylanıp,
Meniń ketkenime júrme qıynalıp,
Qapa bolma qáwenderim, qal endi.

^Gúlzada –
Ketkenińe nege bolayın qapa,
Elde kóp aǵayin qarındas apa,
Eglenip ózindi qılma biywapa,
Sapar etken sáwer yarım, bar endi,

^Ájiniyaz –
Sál jerde basımdı saldım saparǵa,
Ketti dep aytarsan molla Japarǵa,
Húrzadanı jat jerlerge aparma,
Meniń bergen násiyatım al endi,

^Gúlzada –
Bar mashqala qarap tursa hayalǵa,
Hayalıń dónbeyme túrli qıyalǵa,
Aytıp ket kóńlińdi mennen uyalma,
Quda qosqan qarıydarım, bar endi.

^Ájiniyaz –
Gúzde ketip jaz ayında kelmesem,
Tapqan-tergenimdi ákep bermesem,
Altı ayda aq júzińdi kórmesem,
Dúnya bizge alaqannan tar endi.