БӘҲӘР ҲӘМ СЕН (ҒӘЗЗЕЛЛЕР) (BÁHÁR HÁM SEN (ǴÁZZELLER))
Жуп қуралай көзлериңди наз уйқысынан оят, Уйқысын ашсын, оларды гүлзар ишинде ойнат. Наўайы.
Яр, оян наз уйқыдан, таң сәҳәр болып қалды,
Және Әмиў бойында, нәўбәҳәр болып қалды,
Жарқылық, әтшөк шақырды аўыл сыртында ақшам,
Бизге ўәдели айыңда бәҳәр болып қалды.
Егис әнжамындадур Хорезм, қарақалпақ,
Дәўлетли тәрғайында бәҳәр болып қалды.
Елликте қайнап шөлқуўар елдиң мийнет заўқы,
Беруний, Шымбайымда бәҳәр болып қалды.
Қой-жанлық көк қуўалап, жуўсан жупары аңқып,
Қызыл қум жайлаўында бәҳәр болып қалды.
Кийиклер қуралайлап Үстирт шөллигинде,
Саманбай тоғайында бәҳәр болып қалды.
«Бәҳәр шықсын» деп аязда көп қойдың Аязийди,
Енди мине Ибрайымға бәҳәр болып қалды.
***
Саҳыбжамалым, кеўлимниң қусын аўлап алып кет,
Қырмызы гүллер ашылды, орып баўлап алып кет.
Ҳафиз емеспен, берерге Самарқанд, Бухарам жоқ,
Ҳусни темирләниң менен өзиң жаўлап алып кет,
Кимдидур алып кетсең айдын Арал бойына,
Умийдиўарман, мени журттан аўлақ алып кет.
Күншығыста күн ашық азат жамалыңа сениң,
Дуўтарыңды бир шертип, тамбурыңды шалып кет.
Тентирер ақшам самаллар сағынып дийдарыңды,
Мен күткен тал астына жолың түсеп барып кет.
Сениң бийписентлигиң батар шымбайыма,
Бийрәҳимлик жараспас, бир мийрибан болып кет.
Аязлы көз қарасың аязлатты Аязийди,
Жыллы нәзериң менен көз қыйғың салып кет.
***
Лутфыңнан жарлықлап, Лутфий болсам әжеп емес,
Ийип илҳамың йошы, ий болсам әжеп емес.
Жети жуп бийе байлап сабатқа қымыз ушын,
Жолыңда ақ туўырлықлы үй болсам әжеп емес.
Умытқың келсе ҳәм мени, жети бәйит сөз болып,
Кеўил дәптериң ишинде қалсам әжеп емес,
Әмиў бойлары билер қолыңның шарапатын,
Шигит сеўип, алтын терип алсаң әжеп емес.
Сол шарапатлы қолың қалса алақанымда,
Жаслық даўран үйине қайта барсам әжеп емес,
Сениң илҳәмиң, демек заман йошы, бахыт сазы,
Парнас таўына өрмелеп шыға алсам әжеп емес.
Ығбал гүлиңе түскен Аязың маған тийсин,
Қолың жылытар от болып жансам әжеп емес.
***
Нәўбәҳәр келип, ашықларға даўайы болды,
Жер жәҳән жасыл кийип, аспан ҳаўайы болды.
Ҳәр жигит өзинше Фарҳад, ҳәр қыз өзинше Шийрин,
Ҳәр кеўил шайырлықта қудды Наўайы болды.
Ышқыңнан Әмиў тасып, қайтадан болды Жәйҳун,
Қуйынлар қаңбақ қуўып, шөлде жабайы болды.
Өткинши булт өкпесин қолға алып, ызғысып,
Қызғалдақлар қан жылап, ышқы гедайы болды.
Сен, алтын далалардың шаҳла көз ҳүкимдары,
Шөлди бостан етсем деп жаның пидайы болды.
Өңириңде жулдыз жанар, жүзиңде ай сәўлеси,
Ел кеўли – ҳүрмет тахтайы, иззет сарайы болды.
Бул бәҳәрде бир қайырылып бақпадың бизге бирақ,
Билмедим, Аязийдиң недур гүнайы болды!
***
Жулдызлар уйқыламас мудам таң атқанша,
Ышқыдан бийдар адам таң атқанша.
Жаныңа тийсе саҳрайы қосықларым,
Оқыйын Физыўлыдан таң атқанша.
Лекин ҳәр заманның өз саз-сәўбети,
Ким ҳәзир ғәззел тыңлаған таң атқанша?
Салып ығбалдың алтын бесигине,
Тербетер сени заман таң атқанша.
Ал, мен үйиңниң артында тал менен
Ақшам көгерип тураман таң атқанша,
Өзиңниң уйқың қатты, ийтиң сергек,
Жолатпас мени саған таң атқанша.
Алмаған өшиң бар ма бул Аязийде,
Сонша қаст етип маған таң атқанша!
***
Жигитлик майдан тарқаса, мәрдана болалмаспан,
Басқаға саған болғандай пәрўана болалмаспан.
Дәрт сигаретин шегип, түнлерде бағ гезсемде,
Дәртиңнен Мәширепке усап дийўана болалмаспан.
Сен бийгана тутсаң да бизден назырқанып,
Кеўлимде сеннен ҳасла бийгана болалмаспан.
Қәстелер исенбесе буйырған ем шыфасына,
Ҳәким Луқман болсам да дәрмана болалмаспан.
Сеннен өткен енди сол он сегиз гүл мәўсими,
Мен ҳәм жигирма бестеги бир бала болалмаспан.
Еле ҳәм көплерден бирақ самалың патлы, дилбар,
Саҳыпжамалым, сенсиз йошлана алалмаспан.
Түспесин ығбал гүлиңе ҳәргиз қазан Аязы,
Зәрре ынжылсаң мендағы мәстана болалмаспан.
***
Ким айтты: «сеннен бурын сулыў дүньяда болмаған?»
Болған, бирақ бақ-дәўлети бундай сирә да болмаған.
Сендеги бул ығбал-дәўран, сендеги бул ықтыяр
Тилла көшкили Сәнем, Нәдирада болмаған.
Даңклы мийнет, жаслық шырай, хош қылықлы қулқыңа
Кимлер аңсары аўып, жаны пида болмаған!
Ҳәр жулдыздың өз жилўасы, ҳәр сулыўдың өз көрки,
Нәзеримде бирақ бәри сеннен зыяда болмаған.
Бир мыйық тартсаң, соған ишпей-жемей болдым мәс,
Аңласам, ҳеш бир жигит мендей сада болмаған.
Шийринлик болмас жемисте инсан ышқындай татлы,
Муҳаббат ийрими теңиз я дәрьяда болмаған,
Сөзлер қәлемге жалынар «мени жаз», - деп сол нигарға
Сени десе Аязийдиң гәпи ада болмаған!
***
Саялы дарақ дейди, саяңызды көрмедим,
Жемисли бир бақ, дейди, мийўаңызды көрмедим,
Қаншалар уйқысызлыққа гирипдар болды сен деп,
Шифалы дәрмақ дейди, шифаңызды көрмедим.
Гөззаллық дүньясы деп, журт мақтар ҳимметиңди,
Мен өзим лекин зәрре пайдаңызды көрмедим,
Ышқыдан пайда излемек, әлбетте, болар әбес,
Сонда да гүл болмаса ҳәм гияңызды көрмедим.
Көплерге унасада сен деп питкен ғәззеллерим,
Бир жыллы назер аралас баҳаңызды көрмедим,
Шын сүйсең – азабы шийрин, заўқы-сапа деседи,
Ҳижраныңды көрдим, заўқы-сапаңызды көрмедим.
Көп кеўиллерге түскен нурыңызда шегим жоқ,
Лекин Аязийге түскен шуғлаңызды көрмедим.
***
Сүйсең, жақсылар улуғы мен боларман,
Сүймесең, жигит қунығы мен боларман.
Тасқа питкен бир гүл көрсең жолыңда,
Сол лала гүлдиң урығы мен боларман.
Сен бийдар жатсаң ақшам ышқы Фурхатынан,
Сығалар айдың сынығы мен боларман.
Жылқысыз жайлаўда жатса алдыңда
Жылқыманның бир қурығы, – мен боларман.
Соқпағыңды тосса таў арасында
Бурқыған суўдың тынығы, – мен боларман.
Кеўлиңнен шығып егер унаса саған
Қайсы жигиттиң қылығы, – мен боларман,
Сабыр дамла «сабыр қыл» деп кеткен Аязийге,
Болмаса сабырсызлардың шойдығы мен боларман.
***
Жанғандай таң шуғласы ханатлас көйлегиңде,
Гүлленер Ўатан даласы ғаўаша гүллегенде.
Ақ, қызыл гүл, пушты гул ҳәм сыя ирең гүллер
Жасыл жапырақ арасы ғаўаша гүллегенде.
Уштан салған қызыл гүл еркетай сиңлисидур,
Түптеги ақ гүл апасы, ғаўаша гүллегенде.
Апаң турмысқа шығып – гүл ғөрекке отырып,
Топланар зүрәәт сапасы, ғаўаша гүллегенде.
Әмиў, Зәрафшан зер шашып келиншектиң үстине,
Жер кийер той лифасын ғаўаша гүллегенде.
Рақсқа түскен киби гөззал «Бәҳәр» ансамбли,
Баслап Мукаррамасы, ғаўаша гүллегенде
Ал сен тойлатар түриң жоқ ашығың Аязийге,
Бул сапары ҳәм шамасы ғаўаша гүллегенде.
***
Бир қайрылып бақпадың, – шадланып күле алмадым,
Баста дәўраным турып, дәўран сүре алмадым.
Сен жүре алдың менсиз басқалар менен шағлап,
Сенсиз басқалар менен мен шағлап жүре алмадым,
Жети дүркин қыз өтер бир жигиттиң тусынан,
Қайсы дүркин ишинде баратқаның биле алмадым.
Ай жақтысында пахтаға суў алсаң қосық айтып.
Сылдырап ақтым салмаңнан, сен бирақ көре алмадың.
Айтып жүрген косығың ким ҳаққында, ким жазған?
Саған арнап жазғанымды билсең де тән алмадың.
Шайырлық сан-сапатына илинсем де елимде,
Ышқы итибарына илинип, яр саналмадым.
Қосықта еркин қәлем тартса да бул Аязий,
Ғәззел бабында лекин мен Еркин болалмадым.
***
Әлҳәббиз, бул не деген салтанат – аппақ дүнья,
Жер абад, атыз абад, кеўил абад – аппақ дүнья.
Аппақ-аппақ булытлар аўнап дәрья бойына,
Гүз тигер ақ шатырын, – кәрамат аппақ дүнья,
Жүзер «көк корабльлер» ақ толқынларды иреп,
Аспан ақ, жер бети ақ, ғыр әтирап аппақ дүнья.
Қырман қызыллап, күн сайын артып Ўатан дәўлети,
Сен төккен «полат етектен» бинияд аппақ дүнья.
Азат мийнет, ана топырақ, қуяш ҳәм суў аўқамы
Ҳәмириңнен табар адил сиясат, аппақ дүнья,
Ақ жүзиң күнге тотығып, қызыл шаршың желбиреп,
«Ҳарма!» десем еситпейсең азамат «аппақ дүнья».
«Қырманға берекет, гөззал, – Аязийдиң әрманы!
Бастан аяғың тамам муҳаббат – аппақ дүнья.
***
Сонша әзийздур жанға Өзбекстан қырманлары,
Ғәзийне уллы Ўатанға Өзбекстан қырманлары,
Асқар таўлар үстинен күн сүйип ақ сийнесин,
Көринер пүткил жәҳәнге Өзбекстан қырманлары.
Зер шанақтағы мысқал жәмленип тонналарға,
Айланды алты миллионға Өзбекстан қырманлары.
Нақыл бар: «ақ алтынды алтын қоллар жаратар»,
Дәўлет, мақтаныш дийқанға Өзбекстан қырманлары.
Тартсаң текстиллерде гезлеме тоқып оннан,
Уласар ай ҳәм Шолпанға Өзбекстан қырманлары.
Бул пахтакеш халқымның бийик минберидур,
Мийнет мандаты заманға Өзбекстан қырманлары.
Сүйер алтын қолларыңнан ардақлап бул Аязий,
Арзыйди абад дәўранға Өзбекстан қырманлары.
***
Бәҳәр ҳәм сен екеўиңди бәрҳа тәрийп етейин,
(Сөзимди мақтап, өзимди писент етпесең нетейин).
Сәйир етип гөззал Ташкент фонтанлары жанында,
Жүр, жаным, мәрмәр липаслы шәҳәрин көрсетейин.
Гүлин ашыпты дейди Наманганның алмасы,
Зер топырақлы Зәрафшан бойларын көрсетейин,
Сырдәрьяның бойларында саған айтар сырым бар,
Мырзашөлде қызғын мийнет тойларын көрсетейин,
Байсын таўдың басынан Термезди тамашалап,
Әндижанның қуп әжеп жайларын көрсетейин.
Фарҳад қашаўы қазған зер булақ Наўайыдан,
Кенимехтиң қой жайған қырларын көрсетейин.
Сенлик ышқымның бәҳәри қуўды көклем Аязын,
Гөззал Өзбекстанымның бәҳәрин көрсетейин.
***
Қолға ал дуўтарыңды, ҳәр намадан сөйлесин,
Жәннет бар деген жалғандур, Ферғанадан сөйлесин,
Хорезмниң мен сүйген он еки муқамын шал,
Я Раджәбий, Абдулла мәўланадан сөйлесин.
Келтир Халимаханның гүлжүзли «Тәнаўбарын»,
Оның ҳаўазынан ийген әрўанадан сөйлесин.
Айымхан «Дем бермесин» Әмиў бүлбиллерине,
Мейли Надира яки Зульфиядан сөйлесин.
Кеўлим питер, сайраса «Самарқанд ушшақлары»,
Даңқлы қурдасың Турсынай дуганадан сөйлесин.
Өзбек пахтасын әлемге алтын етип танытқан,
Пахтакеш дийхан халқымдай мәрданадан сөйлесин.
Сазың тарыңда сөйлесин Аязий әрманлары,
Сендей жәнанды берген заманадан сөйлесин.
***
Жәйҳун бойына журт ағып ояқ-буйяқлардан,
Хорезм, Ташаўыздан ҳәм қарақалпақлардан,
Басланады зүрәәт тойы мийнет, табыс байрамы,
Таслақ тағыда жайнап қырмызы байрақлардан.
Маңлай тер маржанынан ким бәлент қырман үйсе,
Жығын-жығын журт сүйсинип алғыслар узақлардан.
Боз ордалар шайқалып Ашшы көл аймағында,
Сегиз айдаўдан, әне, ат келер қаяқлардан,
Қыйқыўлы көкпар қызып, палўанлар ыңыранып,
Мүйизлерден от шығып, қум ушар туяқлардан.
«Қыз қуўыў» басланғанда қаштың ақ боз ат минип,
Қуўды торы атлы биреў суўырылып «саяқлардан».
Жетип алып ақ жүзиңнен сүйип қояма деп,
Қарар Аязий диңкеси кетип диз-аяқлардан.
***
Көрдиң бе ол «көрмести» деп, жулдызға қарайын ба?
Билдиңбе «дым билмести» деп, самалдан сорайын ба?
Шардан айырып қарда куўдым қырғаўылдың изин,
Таппадым сени бирақ аўылда я районда.
«Жуўырған алмас, буйырған алар» деген нақыл бар,
Кетип қалдың ба дедим басқаға қолайыңда.
Қуўандым, көрип бүгин ол «айнайы жәҳәннан»
Отырғаныңды мәжилисте Кремль сарайында.
Бир мәҳәл шықтың минберге толған айдай толықсып,
Сүйсинип қол шаппатлар отырған журт маңайыңда.
«Ақ алтын патшасы бул Әмиў гөззалы» десип,
Сыбырласқанын еситип мен шыдап турайын ба:
«Билиң, ол Аязийдиң мақтанышы» деп бақырдым,
Буннан артық бахыт бар ма, досларым, Ибрайымға!
Март, 1976-жыл.
Автордан: Биз бул сапары Күншығыс классик поэзиясының баслы лирик дәстури болған ғәззелдиң жети бәйит (яғный он төрт қатарлық) формасына қәлем сынап, усы қыйын жанрдың қатаң шәртли талапларын толық сақлаўға тырыстық. «Бәҳәр ҳәм сен» атлы бул дүркимде Күншығыстың даңқлы ғәззел усталарынан Ҳафиз, Лутфий, Наўайы, Фызуўлы, Мәширеп, Нәдира, Фурхат, ҳәзирги заман өзбек ғәззелиниң шеберлеринен Сабыр Абдулла ҳәм Еркин Ўахидовлардың, атақлы шаира Зульфияның ҳәр бирине бир ғәззел арналады. Сондай-ақ, классик ғәззеллерди атқарыўшылардан даңқлы көркем өнер шеберлери болған Юнус Раджабий, Халима Насырова, атақлы ойыншы Мукаррама Турғунбаева, қарақалпақ классик қосықларын атқарыўдың устасы Айымхан Шамуратоваларға да базы бир ғәззеллерде ишарат етиледи. Түсиниклер: Рахсқа түсиў – сахнада ойнаў, дүгәна – қурдас, «айнайы жәҳан» – телевизор демек, (И.Ю.).
Яр, оян наз уйқыдан, таң сәҳәр болып қалды,
Және Әмиў бойында, нәўбәҳәр болып қалды,
Жарқылық, әтшөк шақырды аўыл сыртында ақшам,
Бизге ўәдели айыңда бәҳәр болып қалды.
Егис әнжамындадур Хорезм, қарақалпақ,
Дәўлетли тәрғайында бәҳәр болып қалды.
Елликте қайнап шөлқуўар елдиң мийнет заўқы,
Беруний, Шымбайымда бәҳәр болып қалды.
Қой-жанлық көк қуўалап, жуўсан жупары аңқып,
Қызыл қум жайлаўында бәҳәр болып қалды.
Кийиклер қуралайлап Үстирт шөллигинде,
Саманбай тоғайында бәҳәр болып қалды.
«Бәҳәр шықсын» деп аязда көп қойдың Аязийди,
Енди мине Ибрайымға бәҳәр болып қалды.
***
Саҳыбжамалым, кеўлимниң қусын аўлап алып кет,
Қырмызы гүллер ашылды, орып баўлап алып кет.
Ҳафиз емеспен, берерге Самарқанд, Бухарам жоқ,
Ҳусни темирләниң менен өзиң жаўлап алып кет,
Кимдидур алып кетсең айдын Арал бойына,
Умийдиўарман, мени журттан аўлақ алып кет.
Күншығыста күн ашық азат жамалыңа сениң,
Дуўтарыңды бир шертип, тамбурыңды шалып кет.
Тентирер ақшам самаллар сағынып дийдарыңды,
Мен күткен тал астына жолың түсеп барып кет.
Сениң бийписентлигиң батар шымбайыма,
Бийрәҳимлик жараспас, бир мийрибан болып кет.
Аязлы көз қарасың аязлатты Аязийди,
Жыллы нәзериң менен көз қыйғың салып кет.
***
Лутфыңнан жарлықлап, Лутфий болсам әжеп емес,
Ийип илҳамың йошы, ий болсам әжеп емес.
Жети жуп бийе байлап сабатқа қымыз ушын,
Жолыңда ақ туўырлықлы үй болсам әжеп емес.
Умытқың келсе ҳәм мени, жети бәйит сөз болып,
Кеўил дәптериң ишинде қалсам әжеп емес,
Әмиў бойлары билер қолыңның шарапатын,
Шигит сеўип, алтын терип алсаң әжеп емес.
Сол шарапатлы қолың қалса алақанымда,
Жаслық даўран үйине қайта барсам әжеп емес,
Сениң илҳәмиң, демек заман йошы, бахыт сазы,
Парнас таўына өрмелеп шыға алсам әжеп емес.
Ығбал гүлиңе түскен Аязың маған тийсин,
Қолың жылытар от болып жансам әжеп емес.
***
Нәўбәҳәр келип, ашықларға даўайы болды,
Жер жәҳән жасыл кийип, аспан ҳаўайы болды.
Ҳәр жигит өзинше Фарҳад, ҳәр қыз өзинше Шийрин,
Ҳәр кеўил шайырлықта қудды Наўайы болды.
Ышқыңнан Әмиў тасып, қайтадан болды Жәйҳун,
Қуйынлар қаңбақ қуўып, шөлде жабайы болды.
Өткинши булт өкпесин қолға алып, ызғысып,
Қызғалдақлар қан жылап, ышқы гедайы болды.
Сен, алтын далалардың шаҳла көз ҳүкимдары,
Шөлди бостан етсем деп жаның пидайы болды.
Өңириңде жулдыз жанар, жүзиңде ай сәўлеси,
Ел кеўли – ҳүрмет тахтайы, иззет сарайы болды.
Бул бәҳәрде бир қайырылып бақпадың бизге бирақ,
Билмедим, Аязийдиң недур гүнайы болды!
***
Жулдызлар уйқыламас мудам таң атқанша,
Ышқыдан бийдар адам таң атқанша.
Жаныңа тийсе саҳрайы қосықларым,
Оқыйын Физыўлыдан таң атқанша.
Лекин ҳәр заманның өз саз-сәўбети,
Ким ҳәзир ғәззел тыңлаған таң атқанша?
Салып ығбалдың алтын бесигине,
Тербетер сени заман таң атқанша.
Ал, мен үйиңниң артында тал менен
Ақшам көгерип тураман таң атқанша,
Өзиңниң уйқың қатты, ийтиң сергек,
Жолатпас мени саған таң атқанша.
Алмаған өшиң бар ма бул Аязийде,
Сонша қаст етип маған таң атқанша!
***
Жигитлик майдан тарқаса, мәрдана болалмаспан,
Басқаға саған болғандай пәрўана болалмаспан.
Дәрт сигаретин шегип, түнлерде бағ гезсемде,
Дәртиңнен Мәширепке усап дийўана болалмаспан.
Сен бийгана тутсаң да бизден назырқанып,
Кеўлимде сеннен ҳасла бийгана болалмаспан.
Қәстелер исенбесе буйырған ем шыфасына,
Ҳәким Луқман болсам да дәрмана болалмаспан.
Сеннен өткен енди сол он сегиз гүл мәўсими,
Мен ҳәм жигирма бестеги бир бала болалмаспан.
Еле ҳәм көплерден бирақ самалың патлы, дилбар,
Саҳыпжамалым, сенсиз йошлана алалмаспан.
Түспесин ығбал гүлиңе ҳәргиз қазан Аязы,
Зәрре ынжылсаң мендағы мәстана болалмаспан.
***
Ким айтты: «сеннен бурын сулыў дүньяда болмаған?»
Болған, бирақ бақ-дәўлети бундай сирә да болмаған.
Сендеги бул ығбал-дәўран, сендеги бул ықтыяр
Тилла көшкили Сәнем, Нәдирада болмаған.
Даңклы мийнет, жаслық шырай, хош қылықлы қулқыңа
Кимлер аңсары аўып, жаны пида болмаған!
Ҳәр жулдыздың өз жилўасы, ҳәр сулыўдың өз көрки,
Нәзеримде бирақ бәри сеннен зыяда болмаған.
Бир мыйық тартсаң, соған ишпей-жемей болдым мәс,
Аңласам, ҳеш бир жигит мендей сада болмаған.
Шийринлик болмас жемисте инсан ышқындай татлы,
Муҳаббат ийрими теңиз я дәрьяда болмаған,
Сөзлер қәлемге жалынар «мени жаз», - деп сол нигарға
Сени десе Аязийдиң гәпи ада болмаған!
***
Саялы дарақ дейди, саяңызды көрмедим,
Жемисли бир бақ, дейди, мийўаңызды көрмедим,
Қаншалар уйқысызлыққа гирипдар болды сен деп,
Шифалы дәрмақ дейди, шифаңызды көрмедим.
Гөззаллық дүньясы деп, журт мақтар ҳимметиңди,
Мен өзим лекин зәрре пайдаңызды көрмедим,
Ышқыдан пайда излемек, әлбетте, болар әбес,
Сонда да гүл болмаса ҳәм гияңызды көрмедим.
Көплерге унасада сен деп питкен ғәззеллерим,
Бир жыллы назер аралас баҳаңызды көрмедим,
Шын сүйсең – азабы шийрин, заўқы-сапа деседи,
Ҳижраныңды көрдим, заўқы-сапаңызды көрмедим.
Көп кеўиллерге түскен нурыңызда шегим жоқ,
Лекин Аязийге түскен шуғлаңызды көрмедим.
***
Сүйсең, жақсылар улуғы мен боларман,
Сүймесең, жигит қунығы мен боларман.
Тасқа питкен бир гүл көрсең жолыңда,
Сол лала гүлдиң урығы мен боларман.
Сен бийдар жатсаң ақшам ышқы Фурхатынан,
Сығалар айдың сынығы мен боларман.
Жылқысыз жайлаўда жатса алдыңда
Жылқыманның бир қурығы, – мен боларман.
Соқпағыңды тосса таў арасында
Бурқыған суўдың тынығы, – мен боларман.
Кеўлиңнен шығып егер унаса саған
Қайсы жигиттиң қылығы, – мен боларман,
Сабыр дамла «сабыр қыл» деп кеткен Аязийге,
Болмаса сабырсызлардың шойдығы мен боларман.
***
Жанғандай таң шуғласы ханатлас көйлегиңде,
Гүлленер Ўатан даласы ғаўаша гүллегенде.
Ақ, қызыл гүл, пушты гул ҳәм сыя ирең гүллер
Жасыл жапырақ арасы ғаўаша гүллегенде.
Уштан салған қызыл гүл еркетай сиңлисидур,
Түптеги ақ гүл апасы, ғаўаша гүллегенде.
Апаң турмысқа шығып – гүл ғөрекке отырып,
Топланар зүрәәт сапасы, ғаўаша гүллегенде.
Әмиў, Зәрафшан зер шашып келиншектиң үстине,
Жер кийер той лифасын ғаўаша гүллегенде.
Рақсқа түскен киби гөззал «Бәҳәр» ансамбли,
Баслап Мукаррамасы, ғаўаша гүллегенде
Ал сен тойлатар түриң жоқ ашығың Аязийге,
Бул сапары ҳәм шамасы ғаўаша гүллегенде.
***
Бир қайрылып бақпадың, – шадланып күле алмадым,
Баста дәўраным турып, дәўран сүре алмадым.
Сен жүре алдың менсиз басқалар менен шағлап,
Сенсиз басқалар менен мен шағлап жүре алмадым,
Жети дүркин қыз өтер бир жигиттиң тусынан,
Қайсы дүркин ишинде баратқаның биле алмадым.
Ай жақтысында пахтаға суў алсаң қосық айтып.
Сылдырап ақтым салмаңнан, сен бирақ көре алмадың.
Айтып жүрген косығың ким ҳаққында, ким жазған?
Саған арнап жазғанымды билсең де тән алмадың.
Шайырлық сан-сапатына илинсем де елимде,
Ышқы итибарына илинип, яр саналмадым.
Қосықта еркин қәлем тартса да бул Аязий,
Ғәззел бабында лекин мен Еркин болалмадым.
***
Әлҳәббиз, бул не деген салтанат – аппақ дүнья,
Жер абад, атыз абад, кеўил абад – аппақ дүнья.
Аппақ-аппақ булытлар аўнап дәрья бойына,
Гүз тигер ақ шатырын, – кәрамат аппақ дүнья,
Жүзер «көк корабльлер» ақ толқынларды иреп,
Аспан ақ, жер бети ақ, ғыр әтирап аппақ дүнья.
Қырман қызыллап, күн сайын артып Ўатан дәўлети,
Сен төккен «полат етектен» бинияд аппақ дүнья.
Азат мийнет, ана топырақ, қуяш ҳәм суў аўқамы
Ҳәмириңнен табар адил сиясат, аппақ дүнья,
Ақ жүзиң күнге тотығып, қызыл шаршың желбиреп,
«Ҳарма!» десем еситпейсең азамат «аппақ дүнья».
«Қырманға берекет, гөззал, – Аязийдиң әрманы!
Бастан аяғың тамам муҳаббат – аппақ дүнья.
***
Сонша әзийздур жанға Өзбекстан қырманлары,
Ғәзийне уллы Ўатанға Өзбекстан қырманлары,
Асқар таўлар үстинен күн сүйип ақ сийнесин,
Көринер пүткил жәҳәнге Өзбекстан қырманлары.
Зер шанақтағы мысқал жәмленип тонналарға,
Айланды алты миллионға Өзбекстан қырманлары.
Нақыл бар: «ақ алтынды алтын қоллар жаратар»,
Дәўлет, мақтаныш дийқанға Өзбекстан қырманлары.
Тартсаң текстиллерде гезлеме тоқып оннан,
Уласар ай ҳәм Шолпанға Өзбекстан қырманлары.
Бул пахтакеш халқымның бийик минберидур,
Мийнет мандаты заманға Өзбекстан қырманлары.
Сүйер алтын қолларыңнан ардақлап бул Аязий,
Арзыйди абад дәўранға Өзбекстан қырманлары.
***
Бәҳәр ҳәм сен екеўиңди бәрҳа тәрийп етейин,
(Сөзимди мақтап, өзимди писент етпесең нетейин).
Сәйир етип гөззал Ташкент фонтанлары жанында,
Жүр, жаным, мәрмәр липаслы шәҳәрин көрсетейин.
Гүлин ашыпты дейди Наманганның алмасы,
Зер топырақлы Зәрафшан бойларын көрсетейин,
Сырдәрьяның бойларында саған айтар сырым бар,
Мырзашөлде қызғын мийнет тойларын көрсетейин,
Байсын таўдың басынан Термезди тамашалап,
Әндижанның қуп әжеп жайларын көрсетейин.
Фарҳад қашаўы қазған зер булақ Наўайыдан,
Кенимехтиң қой жайған қырларын көрсетейин.
Сенлик ышқымның бәҳәри қуўды көклем Аязын,
Гөззал Өзбекстанымның бәҳәрин көрсетейин.
***
Қолға ал дуўтарыңды, ҳәр намадан сөйлесин,
Жәннет бар деген жалғандур, Ферғанадан сөйлесин,
Хорезмниң мен сүйген он еки муқамын шал,
Я Раджәбий, Абдулла мәўланадан сөйлесин.
Келтир Халимаханның гүлжүзли «Тәнаўбарын»,
Оның ҳаўазынан ийген әрўанадан сөйлесин.
Айымхан «Дем бермесин» Әмиў бүлбиллерине,
Мейли Надира яки Зульфиядан сөйлесин.
Кеўлим питер, сайраса «Самарқанд ушшақлары»,
Даңқлы қурдасың Турсынай дуганадан сөйлесин.
Өзбек пахтасын әлемге алтын етип танытқан,
Пахтакеш дийхан халқымдай мәрданадан сөйлесин.
Сазың тарыңда сөйлесин Аязий әрманлары,
Сендей жәнанды берген заманадан сөйлесин.
***
Жәйҳун бойына журт ағып ояқ-буйяқлардан,
Хорезм, Ташаўыздан ҳәм қарақалпақлардан,
Басланады зүрәәт тойы мийнет, табыс байрамы,
Таслақ тағыда жайнап қырмызы байрақлардан.
Маңлай тер маржанынан ким бәлент қырман үйсе,
Жығын-жығын журт сүйсинип алғыслар узақлардан.
Боз ордалар шайқалып Ашшы көл аймағында,
Сегиз айдаўдан, әне, ат келер қаяқлардан,
Қыйқыўлы көкпар қызып, палўанлар ыңыранып,
Мүйизлерден от шығып, қум ушар туяқлардан.
«Қыз қуўыў» басланғанда қаштың ақ боз ат минип,
Қуўды торы атлы биреў суўырылып «саяқлардан».
Жетип алып ақ жүзиңнен сүйип қояма деп,
Қарар Аязий диңкеси кетип диз-аяқлардан.
***
Көрдиң бе ол «көрмести» деп, жулдызға қарайын ба?
Билдиңбе «дым билмести» деп, самалдан сорайын ба?
Шардан айырып қарда куўдым қырғаўылдың изин,
Таппадым сени бирақ аўылда я районда.
«Жуўырған алмас, буйырған алар» деген нақыл бар,
Кетип қалдың ба дедим басқаға қолайыңда.
Қуўандым, көрип бүгин ол «айнайы жәҳәннан»
Отырғаныңды мәжилисте Кремль сарайында.
Бир мәҳәл шықтың минберге толған айдай толықсып,
Сүйсинип қол шаппатлар отырған журт маңайыңда.
«Ақ алтын патшасы бул Әмиў гөззалы» десип,
Сыбырласқанын еситип мен шыдап турайын ба:
«Билиң, ол Аязийдиң мақтанышы» деп бақырдым,
Буннан артық бахыт бар ма, досларым, Ибрайымға!
Март, 1976-жыл.
Автордан: Биз бул сапары Күншығыс классик поэзиясының баслы лирик дәстури болған ғәззелдиң жети бәйит (яғный он төрт қатарлық) формасына қәлем сынап, усы қыйын жанрдың қатаң шәртли талапларын толық сақлаўға тырыстық. «Бәҳәр ҳәм сен» атлы бул дүркимде Күншығыстың даңқлы ғәззел усталарынан Ҳафиз, Лутфий, Наўайы, Фызуўлы, Мәширеп, Нәдира, Фурхат, ҳәзирги заман өзбек ғәззелиниң шеберлеринен Сабыр Абдулла ҳәм Еркин Ўахидовлардың, атақлы шаира Зульфияның ҳәр бирине бир ғәззел арналады. Сондай-ақ, классик ғәззеллерди атқарыўшылардан даңқлы көркем өнер шеберлери болған Юнус Раджабий, Халима Насырова, атақлы ойыншы Мукаррама Турғунбаева, қарақалпақ классик қосықларын атқарыўдың устасы Айымхан Шамуратоваларға да базы бир ғәззеллерде ишарат етиледи. Түсиниклер: Рахсқа түсиў – сахнада ойнаў, дүгәна – қурдас, «айнайы жәҳан» – телевизор демек, (И.Ю.).
Алдынғы бөлимге қайтыў: ҚЫРҒЫЗ ГАИ ЕРКИНГЕ ЧЕСТЬ БЕРЕДИ...
Китап Мазмунына қайтыў
Социал тармақларда бөлисиў
Егер сиз бул китаптың усы бөлимин унатқан болсаңыз, бул бетти төмендеги социал тармақлар арқалы досларыңыз бенен бөлисиўди умытпаң:
