Қайтқан қусқа толып көк жийек,
Ыссы жаққа ушар тырналар.
Машинаға үйлерин тийеп,
Көл бойынан кетти шарўалар.

Ошақ түтер суў жағасында,
Кеткен оны ийеси таслап,
Бул ошақтың айналасында
Шай ишкенмен талай жамбаслап.

Ғарры шопан үйин жықты да,
Кабинаға отырды енди.
Қос бурымын қойнына тықты да,
Қызы жүктиң үстине минди.

Жүк үстинде ийтин қушақлап,
Барар бизге шай қуйған сол қыз,
Қыз журтында қалған ошаққа
Қарап турман есиркеп жалғыз.

Көлде қуслар базары тарқап,
Ыссы жаққа ушып барады.
Жаслық дәўран отаўын жыйнап,
Бизди таслап көшип барады...

1975-ж.

Qaytqan qusqa tolıp kók jiyek,
Issı jaqqa ushar tırnalar.
Mashinaǵa úylerin tiyep,
Kól boyınan ketti sharwalar.

Oshaq túter suw jaǵasında,
Ketken onı iyesi taslap,
Bul oshaqtıń aynalasında
Shay ishkenmen talay jambaslap.

Ǵarrı shopan úyin jıqtı da,
Kabinaǵa otırdı endi.
Qos burımın qoynına tıqtı da,
Qızı júktiń ústine mindi.

Júk ústinde iytin qushaqlap,
Barar bizge shay quyǵan sol qız,
Qız jurtında qalǵan oshaqqa
Qarap turman esirkep jalǵız.

Kólde quslar bazarı tarqap,
Issı jaqqa ushıp baradı.
Jaslıq dáwran otawın jıynap,
Bizdi taslap kóship baradı...

1975-j.