Қандай жақсы, бирадар,
Адамзаттың жүреги!
Бир адамды бир адам
Жандай жақсы көреди.

Бир адамды бир адам
Сүйип қалар танысса.
Бир адамды бир адам
Сағынады алыста.

Кетсе биреў арадан,
Биреў жоқлап жылайды.
Бир адамнан бир адам
Барып кеңес сорайды.

Оқ атылса биреўге,
Жанын тигип гиреўге,
Жетип барар сүйеўге
Бир адамды бир адам.

Нәпсин тыйып нан берер,
Тамырынан қан берер,
Керегинде жан берер
Бир адамға бир адам.

Океаннан армаған
Азап шексе Корвалан...
Гүрес пенен қорғаған
Бир адамды бир адам.

Жақсылық өсип өнер ме,
Миллионды миллион сүйер ме,
Сүймегенде егер де
Бир адамды бир адам?

Ишип мийрим кәсасын,
Тас жүреклер босасын.
Бәрҳама сүйип жасасын
Бир адамды бир адам!

Сентябрь, 1975-ж.

Qanday jaqsı, biradar,
Adamzattıń júregi!
Bir adamdı bir adam
Janday jaqsı kóredi.

Bir adamdı bir adam
Súyip qalar tanıssa.
Bir adamdı bir adam
Saǵınadı alısta.

Ketse birew aradan,
Birew joqlap jılaydı.
Bir adamnan bir adam
Barıp keńes soraydı.

Oq atılsa birewge,
Janın tigip girewge,
Jetip barar súyewge
Bir adamdı bir adam.

Nápsin tıyıp nan berer,
Tamırınan qan berer,
Kereginde jan berer
Bir adamǵa bir adam.

Okeannan armaǵan
Azap shekse Korvalan...
Gúres penen qorǵaǵan
Bir adamdı bir adam.

Jaqsılıq ósip óner me,
Milliondı million súyer me,
Súymegende eger de
Bir adamdı bir adam?

Íship miyrim kásasın,
Tas júrekler bosasın.
Bárhama súyip jasasın
Bir adamdı bir adam!

Sentyabr, 1975-j.