Он ойылмалы.
Он еки байламалы,
Жалғыз жайламалы,
Қос қулақлы,
Жалғыз туяқлы.

Қарны қабақтай,
Путы табақтай,
Тийип кетсе жылайды,
Жылағаны елге унайды.

Еки қулақ, бир басы бар,
Ҳәр шетинде таңбасы бар,
Жолға салып айдағанда,
Түрли-түрли жорғасы бар.

Үш қазық, еки жип, тоғыз ноқта,
Теңселип тербетеди шешен соқса,
Шешен тил сезге жүйрик болған менен,
Пайдасыз индемейди адам жоқта.

Қәсекенниң мойны узын, қурсағы жуўан,
Беллерин түрме менен орап буўған,
Қазанын көркем етип тастан ойған,
Шығарып бир тесиктен малын сойған.
Текшесин шоты менен дүзетсин деп,
Биреўин бий, биреўин ханы қойған.
Төрт қазық еки жели он төрт ноқта,
Жәҳанды жай әйлеген адам соқса.
Қос қазық, еки жип, он еки ноқта,
Ҳаўазы жағымлы тиллери шийрин,
Бирақ индемейди ҳеш адам жоқта.

Төрт қазық ҳәр арасы еки ели,
Он еки ноқта,
Сөйлейди шежиредей адам соқса.

Ушын-ушын ураман,
Ушынан тартып ураман,
Сапырғаным сайрайман,
Сабы өзимниң қолымда.

Он еки белдеў еки жип,
Еки кемешек бир тиршек.

Еки қулақлы,
Он еки аяқлы,
Еки шешекли.

Жансызға жаратыпты еки қулақ,
Аңласаң еки арасы күтә узақ,
Оларда шеберликтиң бир белгиси,
Қойыпты сулыўлыққа белин қынап.

Қарасам еки қулақ, бир басы бар,
Тартылған он бес жерден таңбасы бар,
Үстине тилин билген минип алса,
Тиймейтуғын еки аяқлы жорғасы бар.

Тийсең тийеди, тиймесең индемейди.

Он еки аяқлы,
Еки қулақлы.

Бир жағы жиңишке, бир жағы жуўан,
Қос қазық, еки жип, он еки ноқта,
Ҳаўазы жағымлы, тиллери шийрин,
Бирақ индемейди ҳеш киси жоқта.

Он еки белдеў, еки арқан,
Еки қазық бир бақан.

Бир қыз көрдим хасыл зат,
Көкирегинде сызған хат,
Орай таслап белбеўин,
Он еки жерден байлаған.

Дүлдүлдиң еки қулақ, бир басы бар,
Дүлдүлдиң он еки жерден таңбасы бар,
Дүлдүлди жолға салып жибергенде,
Ҳәр қыйлы шайқатылған жорғасы бар.

On oyılmalı.
On eki baylamalı,
Jalǵız jaylamalı,
Qos qulaqlı,
Jalǵız tuyaqlı.

Qarnı qabaqtay,
Putı tabaqtay,
Tiyip ketse jılaydı,
Jılaǵanı elge unaydı.

Eki qulaq, bir bası bar,
Hár shetinde tańbası bar,
Jolǵa salıp aydaǵanda,
Túrli-túrli jorǵası bar.

Úsh qazıq, eki jip, toǵız noqta,
Teńselip terbetedi sheshen soqsa,
Sheshen til sezge júyrik bolǵan menen,
Paydasız indemeydi adam joqta.

Qásekenniń moynı uzın, qursaǵı juwan,
Bellerin túrme menen orap buwǵan,
Qazanın kórkem etip tastan oyǵan,
Shıǵarıp bir tesikten malın soyǵan.
Tekshesin shotı menen dúzetsin dep,
Birewin biy, birewin xanı qoyǵan.
Tórt qazıq eki jeli on tórt noqta,
Jáhandı jay áylegen adam soqsa.
Qos qazıq, eki jip, on eki noqta,
Hawazı jaǵımlı tilleri shiyrin,
Biraq indemeydi hesh adam joqta.

Tórt qazıq hár arası eki eli,
On eki noqta,
Sóyleydi shejiredey adam soqsa.

Ushın-ushın uraman,
Ushınan tartıp uraman,
Sapırǵanım sayrayman,
Sabı ózimniń qolımda.

On eki beldew eki jip,
Eki kemeshek bir tirshek.

Eki qulaqlı,
On eki ayaqlı,
Eki sheshekli.

Jansızǵa jaratıptı eki qulaq,
Ańlasań eki arası kútá uzaq,
Olarda sheberliktiń bir belgisi,
Qoyıptı sulıwlıqqa belin qınap.

Qarasam eki qulaq, bir bası bar,
Tartılǵan on bes jerden tańbası bar,
Ústine tilin bilgen minip alsa,
Tiymeytuǵın eki ayaqlı jorǵası bar.

Tiyseń tiyedi, tiymeseń indemeydi.

On eki ayaqlı,
Eki qulaqlı.

Bir jaǵı jińishke, bir jaǵı juwan,
Qos qazıq, eki jip, on eki noqta,
Hawazı jaǵımlı, tilleri shiyrin,
Biraq indemeydi hesh kisi joqta.

On eki beldew, eki arqan,
Eki qazıq bir baqan.

Bir qız kórdim xasıl zat,
Kókireginde sızǵan xat,
Oray taslap belbewin,
On eki jerden baylaǵan.

Dúldúldiń eki qulaq, bir bası bar,
Dúldúldiń on eki jerden tańbası bar,
Dúldúldi jolǵa salıp jibergende,
Hár qıylı shayqatılǵan jorǵası bar.