Дәрьяның аржағында жалғыз жайын,
Ол жайын аўзын ашса он сегиз шортан тайын,
Далаға шығып кетип «раҳим етип»,
Шабақтың жыйнап берер күлли майын.

Төрт тулға бир нәрсеге басын иймек,
Болмаса төрт тулғаның егер бири,
Шәртине келиспейди таўып бермек.
Күши бар қәҳәрленсе жан шыдатпас,
Адамзат қуўат берген айрықша бөлек.

Өңгерип сынбасымды шықтым жолға,
Мингеним өмиримше озған жорға,
Жанымдағы жолдасым жаман еди-аў,
Бийабырай етпегей иркип жолда.

Жигирма үйрек, отыз ғаз,
Ушып жүрди пыр-пырлап,
Тамға таяқ сүйедим,
Отызда бестен сыр-сырлап.
Қырым деген шәҳәрдиң,
Ортасында қырқ булақ,
Бәйбишени байға көндирдим,
Ақыл менен тур-турлап.
Алпыс қасқыр аналы,
Онын қасты қой қырмақ.

Бир шенеўли, бир шенеўсиз.
Бир белдеўли, бир белдеўсиз,
Бир аўнамас, бир гүйсемес,
Бир путсиз, бир сүтсиз.

Барып едим жоқ екен,
Айтып едим бараман деди,
Келгени ғой келмегени,
Келмегенде келер еди.

– Бизден бир шымшық қашты.
– Нешик?
– Қырық қулағы қырық жеринен тесик.
– Неше улы бар, неше қызы бар?
– Үш улы бар, еки қызы бар, ерли-зайып екеўи.
II түри:
– Бизден бир шымшық қашты.
– Нешик?
– Он қулағы оттай тесик.
– Неше улы бар, неше қызы бир?
– Бир қызы бар, еки улы бар, ерли-зайып екеўи.
– Аўылдама, қаладама?
– Айтыўшы аўылда я қалада деп бағдар силтейди.

Уллы мәртебели Хийўаның ханы,
Сизге қурбан болсын бәршениң жаны,
Бир жигит қалыпты қызыр шөлинде,
Бес жигит жиберип алдырын оны.

Бир жигит бир қызды мингестирип киятыр екен, сонда алдынан бир жигит шығып «Мына қызды алып қашып киятырсаңба?» – дейди.
Сонда қыз:
– Ҳәй-ҳәй жигит, ҳәй жигит,
Абайлап сөйле сен жигит,
Бул жигиттиң қайын енеси,
Мениң анамның қудағайы,
Сонда мен неси боламан дейди,

Бир қой бир қасқырды ҳәм бир баў бедени бирин-бирине жегизбей бир қайықта дәрьяның аржағына алып өтип бер?

Тоқсан өгизди тоғыз қораға тақтан қамап бер.

Бир ғаз ушып киятырып, қайраўда отырған ғазларға қарап:
– Ассалаўма әлейкум жүз ғаз, – дейди. Сонда қайраўда отырған ғазлар:
– Жоқ кеширесиз, биз жүз емеспиз, жүз болыў ушын бизлерге тағы усындай, және оның жартысындай, және оның жартысындай ғаз қосылса ҳәм сениң өзиң қосылсаң, сонда жүз боламыз, – дейди.

Dáryanıń arjaǵında jalǵız jayın,
Ol jayın awzın ashsa on segiz shortan tayın,
Dalaǵa shıǵıp ketip «rahim etip»,
Shabaqtıń jıynap berer kúlli mayın.

Tórt tulǵa bir nársege basın iymek,
Bolmasa tórt tulǵanıń eger biri,
Shártine kelispeydi tawıp bermek.
Kúshi bar qáhárlense jan shıdatpas,
Adamzat quwat bergen ayrıqsha bólek.

Óńgerip sınbasımdı shıqtım jolǵa,
Mingenim ómirimshe ozǵan jorǵa,
Janımdaǵı joldasım jaman edi-aw,
Biyabıray etpegey irkip jolda.

Jigirma úyrek, otız ǵaz,
Ushıp júrdi pır-pırlap,
Tamǵa tayaq súyedim,
Otızda besten sır-sırlap.
Qırım degen sháhárdiń,
Ortasında qırq bulaq,
Báybisheni bayǵa kóndirdim,
Aqıl menen tur-turlap.
Alpıs qasqır analı,
Onın qastı qoy qırmaq.

Bir shenewli, bir shenewsiz.
Bir beldewli, bir beldewsiz,
Bir awnamas, bir gúysemes,
Bir putsiz, bir sútsiz.

Barıp edim joq eken,
Aytıp edim baraman dedi,
Kelgeni ǵoy kelmegeni,
Kelmegende keler edi.

– Bizden bir shımshıq qashtı.
– Neshik?
– Qırıq qulaǵı qırıq jerinen tesik.
– Neshe ulı bar, neshe qızı bar?
– Úsh ulı bar, eki qızı bar, erli-zayıp ekewi.
II túri:
– Bizden bir shımshıq qashtı.
– Neshik?
– On qulaǵı ottay tesik.
– Neshe ulı bar, neshe qızı bir?
– Bir qızı bar, eki ulı bar, erli-zayıp ekewi.
– Awıldama, qaladama?
– Aytıwshı awılda ya qalada dep baǵdar silteydi.

Ullı mártebeli Xiywanıń xanı,
Sizge qurban bolsın bársheniń janı,
Bir jigit qalıptı qızır shólinde,
Bes jigit jiberip aldırın onı.

Bir jigit bir qızdı mingestirip kiyatır eken, sonda aldınan bir jigit shıǵıp «Mına qızdı alıp qashıp kiyatırsańba?» – deydi.
Sonda qız:
– Háy-háy jigit, háy jigit,
Abaylap sóyle sen jigit,
Bul jigittiń qayın enesi,
Meniń anamnıń qudaǵayı,
Sonda men nesi bolaman deydi,

Bir qoy bir qasqırdı hám bir baw bedeni birin-birine jegizbey bir qayıqta dáryanıń arjaǵına alıp ótip ber?

Toqsan ógizdi toǵız qoraǵa taqtan qamap ber.

Bir ǵaz ushıp kiyatırıp, qayrawda otırǵan ǵazlarǵa qarap:
– Assalawma áleykum júz ǵaz, – deydi. Sonda qayrawda otırǵan ǵazlar:
– Joq keshiresiz, biz júz emespiz, júz bolıw ushın bizlerge taǵı usınday, jáne onıń jartısınday, jáne onıń jartısınday ǵaz qosılsa hám seniń óziń qosılsań, sonda júz bolamız, – deydi.