Мәкемемизге Бектемиров деген киси бөлим баслық болып келип, ҳәммениң төбеси көкке жетип қалды.

— Енди директорымыздың өриси тарылды, бул киси ҳеш кимниң бет-жүзине қарамайды.

— Бектемиров пенен ислескен директор, қолға үйретилген тайдай болып қалады.

— Бизлердиң қәдиримизди енди биледи.

Лекин, Бектемиров журт ғаўқылдасқандай болып шықпады. Директордың баяғы озбырлығы күшейсе-күшейди дә, пәсеймеди. Үйине қонақ келетуғын болса төрт-бес жигит хызметте. Ҳаяллар баўырсақ писиреди, аўқат асады. Кеңсеге еки нәрсе келсе, биреўи соның үйинде қалады. Қулласы, өзи хан, өзи султан. Бектемировтың өзи түўе, әкеси тирилип келсе де, оннан айбынатуғын директор жоқ.

Ақыры, хызметкерлер шыдай алмады. Бектемировты ортаға алды.

— Биз сизден үлкен үмит күтип едик, неге үндемейсиз?

— Сизден директор түўе басқармадағылар зирилдесип қалады десип еди?

Бектемиров әсте мыйықтан күлип жуўап берди.

— Ол баяғыда еди, жигитлер. Ҳәзир ўақыт басқа. Мен буннан алдынғы ислеген мәкемемде директорға наразы болып, район ҳәкимиятына хат жазған едим. Тексерип келди. Бир күн қонақ болды да кетти. Алдымыздағы ярым айлықта ҳәммеден сыпыртып отыз сомнан услады.

— Бул не? — десек.

— Тексериўди күттик, — деген жуўап алдық.

Ашыў менен ўалаятлық басқармаға жаздым. Бес адам үш күн тексерип жатты.

Кейинги ярым айлықтан шеттен жүз сомнан жыйнап алды.

— Бул не?

— Тексериўди күтиўге кетти.

Болмады. Жәмәәт болып республикалық министрге жаздық. Жети адам он күн жатып тексерди. Қандай илаж көрип кеткенин билмеймиз. Келеси ярым айлыққа қол қойдық, ақлай.

— Пул қайда?

— Комиссияны күтиўге кетти. Соннан баслық бир жақта қалды да, ҳәмме мениң изиме түсти.

— Бәри сениң таўып жүрген бәлең!

— Бала-шағамызды үйиңе апарып таслаймыз, өзиң бақ.

— Жақсысы, сен бул жерден кет, көзимизге шүйелден бетер көринип турсаң.

Әне, солай етип, жумыстан шығып кетиўге мәжбүр болдым. Сизлер мени және сол жолға ийтермелейжақсыз.

Усы ўақытлары директордың шоферы кирип келди.

— Бәрекалла! Ҳәммеңиз усы жерде екенсиз ғо. Жүриң, директордың жеке меншик фирмасына вагон қойды. Қаўын тийейсиз.

Ҳәмме сыртқа шығыў менен болды. Оларды Бектемиров баслап барар еди.

Mákememizge Bektemirov degen kisi bólim baslıq bolıp kelip, hámmeniń tóbesi kókke jetip qaldı.

— Endi direktorımızdıń órisi tarıldı, bul kisi hesh kimniń bet-júzine qaramaydı.

— Bektemirov penen islesken direktor, qolǵa úyretilgen tayday bolıp qaladı.

— Bizlerdiń qádirimizdi endi biledi.

Lekin, Bektemirov jurt ǵawqıldasqanday bolıp shıqpadı. Direktordıń bayaǵı ozbırlıǵı kúsheyse-kúsheydi dá, páseymedi. Úyine qonaq keletuǵın bolsa tórt-bes jigit xızmette. Hayallar bawırsaq pisiredi, awqat asadı. Keńsege eki nárse kelse, birewi sonıń úyinde qaladı. Qullası, ózi xan, ózi sultan. Bektemirovtıń ózi túwe, ákesi tirilip kelse de, onnan aybınatuǵın direktor joq.

Aqırı, xızmetkerler shıday almadı. Bektemirovtı ortaǵa aldı.

— Biz sizden úlken úmit kútip edik, nege úndemeysiz?

— Sizden direktor túwe basqarmadaǵılar zirildesip qaladı desip edi?

Bektemirov áste mıyıqtan kúlip juwap berdi.

— Ol bayaǵıda edi, jigitler. Házir waqıt basqa. Men bunnan aldınǵı islegen mákememde direktorǵa narazı bolıp, rayon hákimiyatına xat jazǵan edim. Tekserip keldi. Bir kún qonaq boldı da ketti. Aldımızdaǵı yarım aylıqta hámmeden sıpırtıp otız somnan usladı.

— Bul ne? — desek.

— Tekseriwdi kúttik, — degen juwap aldıq.

Ashıw menen walayatlıq basqarmaǵa jazdım. Bes adam úsh kún tekserip jattı.

Keyingi yarım aylıqtan shetten júz somnan jıynap aldı.

— Bul ne?

— Tekseriwdi kútiwge ketti.

Bolmadı. Jámáát bolıp respublikalıq ministrge jazdıq. Jeti adam on kún jatıp tekserdi. Qanday ilaj kórip ketkenin bilmeymiz. Kelesi yarım aylıqqa qol qoydıq, aqlay.

— Pul qayda?

— Komissiyanı kútiwge ketti. Sonnan baslıq bir jaqta qaldı da, hámme meniń izime tústi.

— Bári seniń tawıp júrgen báleń!

— Bala-shaǵamızdı úyińe aparıp taslaymız, óziń baq.

— Jaqsısı, sen bul jerden ket, kózimizge shúyelden beter kórinip tursań.

Áne, solay etip, jumıstan shıǵıp ketiwge májbúr boldım. Sizler meni jáne sol jolǵa iytermeleyjaqsız.

Usı waqıtları direktordıń shoferı kirip keldi.

— Bárekalla! Hámmeńiz usı jerde ekensiz ǵo. Júriń, direktordıń jeke menshik firmasına vagon qoydı. Qawın tiyeysiz.

Hámme sırtqa shıǵıw menen boldı. Olardı Bektemirov baslap barar edi.