Мураплар алды тилланы,
Айтты олланы-билланы,
Қазбай жылдағы салманы,
Суў там-тарыс болды быйыл.

Суў келмеди көк шыққанда,
Әтшөк қуслар шақырғанда,
Я бақ деп шығыр қурғанда,
Жаплар кеўип қалды быйыл.

Жүз өткенде, егин ектик,
Қарық жарып қаўын тиктик.
Ақыры ийт түйнек жедик,
Жаманлыққа түсти быйыл.

Суў келмеди атызларға.
Әспек болды күши барға,
Ақсақ мурап – ақсақ ғарға.
Байлар менен жүрди быйыл.

Қоян жылы жақынлады,
Жылқы жылы халық шуўлады,
Қорқып жүрегим суўлады,
Сондай қыйын болды быйыл.

Шегиртке жеди арпаны,
Қалыпты тозаң-топаны,
Айырып келип қопаны,
Қабан да жаў болды быйыл.

Жерлеримиз болды аяқ,
Әспекти ашып, жедик таяқ,
Мурап болып өңкей саяқ,
Қасық дәнсиз қалдық быйыл.

Басалайды баса тартып,
Быламыққа шопақ қатып,
Жутым ушын кийим сатып,
Қыйыншылық болды быйыл.

Аштан өлди нешше адам,
Суўыққа да бермей шыдам,
Ашлық болды кетпей мудам,
Бәринен де өтти быйыл.

Аман қоймай усы ҳалға,
Көп адамды салып жолға,
Қазыўға айдады бәрҳа,
Сүргиншилик болды быйыл.

Бардық қазыўға азықсыз,
Жедик таяқты жазықсыз,
Байлаўлы турдық қазықсыз,
Қазыў аўыр болды быйыл.

Ылайды алды, шаққаны,
Таўсылып кимниң тақаны,
Тийди мураптық бақаны,
Сондай қырғын болды быйыл.

Адамлар жүр жалаң аяқ,
Ҳалы оның қалай болмақ,
Мурап сонда да урды таяқ,
Жаман ислер болды быйыл.

Солай болып истиң жөни,
Қозғала алмай, шықпай үни,
Биразлардың қалды көни,
Өлгенлер көп болды быйыл.

Muraplar aldı tillanı,
Ayttı ollanı-billanı,
Qazbay jıldaǵı salmanı,
Suw tam-tarıs boldı bıyıl.

Suw kelmedi kók shıqqanda,
Átshók quslar shaqırǵanda,
Ya baq dep shıǵır qurǵanda,
Japlar kewip qaldı bıyıl.

Júz ótkende, egin ektik,
Qarıq jarıp qawın tiktik.
Aqırı iyt túynek jedik,
Jamanlıqqa tústi bıyıl.

Suw kelmedi atızlarǵa.
Áspek boldı kúshi barǵa,
Aqsaq murap – aqsaq ǵarǵa.
Baylar menen júrdi bıyıl.

Qoyan jılı jaqınladı,
Jılqı jılı xalıq shuwladı,
Qorqıp júregim suwladı,
Sonday qıyın boldı bıyıl.

Shegirtke jedi arpanı,
Qalıptı tozań-topanı,
Ayırıp kelip qopanı,
Qaban da jaw boldı bıyıl.

Jerlerimiz boldı ayaq,
Áspekti ashıp, jedik tayaq,
Murap bolıp óńkey sayaq,
Qasıq dánsiz qaldıq bıyıl.

Basalaydı basa tartıp,
Bılamıqqa shopaq qatıp,
Jutım ushın kiyim satıp,
Qıyınshılıq boldı bıyıl.

Ashtan óldi neshshe adam,
Suwıqqa da bermey shıdam,
Ashlıq boldı ketpey mudam,
Bárinen de ótti bıyıl.

Aman qoymay usı halǵa,
Kóp adamdı salıp jolǵa,
Qazıwǵa aydadı bárha,
Súrginshilik boldı bıyıl.

Bardıq qazıwǵa azıqsız,
Jedik tayaqtı jazıqsız,
Baylawlı turdıq qazıqsız,
Qazıw awır boldı bıyıl.

Ilaydı aldı, shaqqanı,
Tawsılıp kimniń taqanı,
Tiydi muraptıq baqanı,
Sonday qırǵın boldı bıyıl.

Adamlar júr jalań ayaq,
Halı onıń qalay bolmaq,
Murap sonda da urdı tayaq,
Jaman isler boldı bıyıl.

Solay bolıp istiń jóni,
Qozǵala almay, shıqpay úni,
Birazlardıń qaldı kóni,
Ólgenler kóp boldı bıyıl.