Ақ бийдайы турып сулы сепкеннен,
Таза салы турып, шигин еккеннен,
Жөнсиз қырық күн қайғы-уўайым шеккеннен,
Ден саўлықта бир күн шадлық жақсырақ.

Дүньяға шыққан соң бахтың ашылса,
Душпанларың аяғына бас урса,
Жаў бағынып, еки қолын қаўсырса,
Көзди алартқаннан иззет жақсырақ.

Жумыс исле туўылған соң ел ушын.
Жаныңды аяма елде ер ушын,
Киндиктен қан тамып, туўған жер ушын,
Өлип кеткениңше хызмет жақсырақ.

Орымбет, Нурымбет, Жалал, Сүлайман,
Сапар, Мырза, Арзыў, Еримбет иймам,
Халықтың қанын сорған гилең бий ийман,
Бәринен биздей бир гедей жақсырақ.

Анаў отырыпты Қулмурат, Муўса,
Кеўли ҳеш ағармас қырық шайып жуўса,
Жарлыларға бахыт, нурлы күн туўса,
Өшимди алмасам өлген жақсырақ.

Басқа кемлик келип түсти уўайым,
Себепсиз таяқ жеп, недур гүнайым?
Жерди-көкти халық әйлеген қудайым,
Бул жүристен әжел келген жақсырақ.

Бир ақшам айттырып урдың жазықсыз,
Не шара байлаўда турмыз қазықсыз,
Қарақалпақ күниң өтти жарықсыз,
Бул өткен өмирден зиндан жақсырақ.

Не ҳасыл сөз айттым, өтти паянсыз,
Не хызметлер еттим, кетти аянсыз.
Мен де жан едим журтқа зыянсыз,
Хорлық көрдим, тек өлгеннен жақсырақ.

Бердимурат айтар көре алмай жақты,
Өлим кетер болды ашылмай бахты,
Бердимурат – халықты, халық – Бердақты,
Жалғызындай көрер, жаннан жақсырақ.

Aq biydayı turıp sulı sepkennen,
Taza salı turıp, shigin ekkennen,
Jónsiz qırıq kún qayǵı-uwayım shekkennen,
Den sawlıqta bir kún shadlıq jaqsıraq.

Dúnyaǵa shıqqan soń baxtıń ashılsa,
Dushpanlarıń ayaǵına bas ursa,
Jaw baǵınıp, eki qolın qawsırsa,
Kózdi alartqannan izzet jaqsıraq.

Jumıs isle tuwılǵan soń el ushın.
Janıńdı ayama elde er ushın,
Kindikten qan tamıp, tuwǵan jer ushın,
Ólip ketkenińshe xızmet jaqsıraq.

Orımbet, Nurımbet, Jalal, Súlayman,
Sapar, Mırza, Arzıw, Erimbet iymam,
Xalıqtıń qanın sorǵan gileń biy iyman,
Bárinen bizdey bir gedey jaqsıraq.

Anaw otırıptı Qulmurat, Muwsa,
Kewli hesh aǵarmas qırıq shayıp juwsa,
Jarlılarǵa baxıt, nurlı kún tuwsa,
Óshimdi almasam ólgen jaqsıraq.

Basqa kemlik kelip tústi uwayım,
Sebepsiz tayaq jep, nedur gúnayım?
Jerdi-kókti xalıq áylegen qudayım,
Bul júristen ájel kelgen jaqsıraq.

Bir aqsham ayttırıp urdıń jazıqsız,
Ne shara baylawda turmız qazıqsız,
Qaraqalpaq kúniń ótti jarıqsız,
Bul ótken ómirden zindan jaqsıraq.

Ne hasıl sóz ayttım, ótti payansız,
Ne xızmetler ettim, ketti ayansız.
Men de jan edim jurtqa zıyansız,
Xorlıq kórdim, tek ólgennen jaqsıraq.

Berdimurat aytar kóre almay jaqtı,
Ólim keter boldı ashılmay baxtı,
Berdimurat – xalıqtı, xalıq – Berdaqtı,
Jalǵızınday kórer, jannan jaqsıraq.