Ағалар, ярымның тәрийпин десем,
Туўбы ағаш, аның қадди далыды,
Қулқы, пығлы, ҳалы-аўҳалын десем,
Мисли Мәжнүм сүйген Ләйли яңлыды.

Беглер, тәрийп етсем гезген елатты,
Ол елде көрмишем бир пәрийзатты,
Бақсам гүл жүзине әтир, ай бетли,
Жәннет руўқынында тоты яңлыды.

Айтсам тең келмейди әлемниң бәрин,
Ҳүрлер жолдас емес, десем тәрийпин,
Баян етсем аның исми шәрийпин,
Өткен бир яқшының аты яңлыды.

Аны өз сүнийдиң яратмыш субҳан,
Йүзи он төрт күнлик айдек нәмаян,
Көрген бийҳүш болур аны шул заман,
Сәйил етип беҳиштен шыққан яңлыды.

Қантыў-набат, шаҳди-шәккәр ашлары,
Қундыздан қарадур аның шашлары,
Зәйин етсеңиз аның қалем қашлары,
Қәтип қәлем менен жазған яңлыды.

Отырышы – тырна, йүриши – ғаздур,
Бастан аяқ тамам ағзасы наздур,
Хош сүўрет, хош әдеп, бир алғыр баздур,
Мысалы, бақышы лашын яңлыды.

Зайығ болур бийўәпаның йүргени,
Айшы әшрет, заўқы-сапа сүргени,
Бир күн алып кетсе малын бергени,
Мисли, қуш қашырған қәлпе яңлыды,

Зийўар айтар, енди не ҳалың кешәр,
Я шу күн, я таңла кәрўаның көшәр,
Саў болсаң басыңа ҳәрбир ис түшәр,
Бийўәпа яр паний дүнья яңлыды.

Aǵalar, yarımnıń táriypin desem,
Tuwbı aǵash, anıń qaddi dalıdı,
Qulqı, pıǵlı, halı-awhalın desem,
Misli Májnúm súygen Láyli yańlıdı.

Begler, táriyp etsem gezgen elattı,
Ol elde kórmishem bir páriyzattı,
Baqsam gúl júzine átir, ay betli,
Jánnet ruwqınında totı yańlıdı.

Aytsam teń kelmeydi álemniń bárin,
Húrler joldas emes, desem táriypin,
Bayan etsem anıń ismi sháriypin,
Ótken bir yaqshınıń atı yańlıdı.

Anı óz súniydiń yaratmısh subhan,
Yúzi on tórt kúnlik aydek námayan,
Kórgen biyhúsh bolur anı shul zaman,
Sáyil etip behishten shıqqan yańlıdı.

Qantıw-nabat, shahdi-shákkár ashları,
Qundızdan qaradur anıń shashları,
Záyin etseńiz anıń qalem qashları,
Qátip qálem menen jazǵan yańlıdı.

Otırıshı – tırna, yúrishi – ǵazdur,
Bastan ayaq tamam aǵzası nazdur,
Xosh súwret, xosh ádep, bir alǵır bazdur,
Mısalı, baqıshı lashın yańlıdı.

Zayıǵ bolur biywápanıń yúrgeni,
Ayshı áshret, zawqı-sapa súrgeni,
Bir kún alıp ketse malın bergeni,
Misli, qush qashırǵan qálpe yańlıdı,

Ziywar aytar, endi ne halıń keshár,
Ya shu kún, ya tańla kárwanıń kóshár,
Saw bolsań basıńa hárbir is túshár,
Biywápa yar paniy dúnya yańlıdı.