Қырық күнде ҳәўледиң, еки айда күлдиң,
Бир йылда отырдың, еккиңде йүрдиң,
Үштен өтип, төрт яшыңда сөзләдиң,
Бештен алты яшқа өттиң Мадаўар.

Етти яшта түшәр дәндан бүбагиң,
Сәккиз яшта нақыш үйледиң көйләгин,
Тоққызда жизлайып жүмлә сүйәгин,
Он-онбир яшыңдын көштиң, Мадаўар.

Он еккидә қоша мәммәң билинип,
Он үш яшта тақыйық көзге көринип,
Он беш яшта йигит әли урылып,
Ышқ шарабыдан иштиң, Мадаўар.

Он алтыда бир нәўбәҳәр қыз олдың,
Он еттидә шәшми қамар йүз олдың,
Он сәккизде шийрин-шәкар сөз олдың,
Он тоққызда толып таштың, Мадаўар.

Иигирма яшыңда кәмала келип,
Ышқ қанжарый билән бағрыңны тилип,
Буў паный дүньяның өтәрин билип,
Ышқының тарийхына түштиң, Мадаўар.

Ҳеш тәлим алмадың ойнап-күлмәктин,
Яқшыға бас қошып, дәўран сүрмектин,
Айбүйир атаў билән Кесе етектен,
Несип болып Шөркөл көштиң, Мадаўар.

Шөркөл, Шөркөл дийип, меҳнатлар көрип,
Нешше мүддет, нешше күнлер йол йүрип,
Хош ўақыт, хоррам болып, Шөркөлге келип
Несийбе еткен тузны иштиң, Мадаўар.

Келип буў Шөркәлде сүрдиң дәўраный,
Ашықларға салдың йүзмың әрманый,
Көрип кимса яхшый, кимса яманый,
Бир яқшыға башын қостың, Мадаўар.

Ышқы ғәлиб болып, таппай парахат,
Бир, еккигә нәпсиң қылмай қанаат,
Ашықлар көңлини әйлеп жарахат,
Ол яқшыдан айра түштиң, Мадаўар.

Көрдиң бирнеше күн ышқың меҳнатин,
Шектиң айралықтың яне зәҳмәтин,
Ақыр татып ашықлықтың ләззетин,
Атадан, анадан кештиң, Мадаўар.

Қыз өзин гизнәмак лазымдур билсәң,
Бийғаят, айиб йерир, бийпәрўа йүрсәң,
Бнр йигитниң атын, жөнин жай көрсең,
Әлиң былғап, қушақ аштың, Мадаўар.

Беш күн бул дүньяда ойнап-күләм деп,
Әйши-әшират, заўқы-сапа сүрәм деп,
Көңлүм сүйгән йигит билән йүрәм деп,
Уяттан, абыройдан кештиң, Мадаўар.

Көңлиңе алған иштин бәршәсин етип,
Уят, иззет, абыройыны тәрк етип,
Көңлиңни сен гүнә ишке беркитип,
Ҳараммеди етти пуштың, Мадаўар?

Мадаўар қыз ерте турып гүңиренди,
Яш башыдан гүнә ишни үгранди,
Кимни көрсе бойын қушып имиранди,
Ышқ отына күйип-пиштиң, Мадаўар.

Таўсыпыңды айта берсем түкәнмас,
Тәрийпиңни шунша язсам кешалмас,
Яранлар, мен болдым, имди йүрир бас,
Буў сөз бирлә таптым пуштын, Мадаўар.

Qırıq kúnde háwlediń, eki ayda kúldiń,
Bir yılda otırdıń, ekkińde yúrdiń,
Úshten ótip, tórt yashıńda sózládiń,
Beshten altı yashqa óttiń Madawar.

Etti yashta túshár dándan búbagiń,
Sákkiz yashta naqısh úylediń kóylágin,
Toqqızda jizlayıp júmlá súyágin,
On-onbir yashıńdın kóshtiń, Madawar.

On ekkidá qosha mámmáń bilinip,
On úsh yashta taqıyıq kózge kórinip,
On besh yashta yigit áli urılıp,
Ishq sharabıdan ishtiń, Madawar.

On altıda bir náwbáhár qız oldıń,
On ettidá sháshmi qamar yúz oldıń,
On sákkizde shiyrin-shákar sóz oldıń,
On toqqızda tolıp tashtıń, Madawar.

Íigirma yashıńda kámala kelip,
Ishq qanjarıy bilán baǵrıńnı tilip,
Buw panıy dúnyanıń ótárin bilip,
Ishqınıń tariyxına túshtiń, Madawar.

Hesh tálim almadıń oynap-kúlmáktin,
Yaqshıǵa bas qoshıp, dáwran súrmektin,
Aybúyir ataw bilán Kese etekten,
Nesip bolıp Shórkól kóshtiń, Madawar.

Shórkól, Shórkól diyip, mehnatlar kórip,
Neshshe múddet, neshshe kúnler yol yúrip,
Xosh waqıt, xorram bolıp, Shórkólge kelip
Nesiybe etken tuznı ishtiń, Madawar.

Kelip buw Shórkálde súrdiń dáwranıy,
Ashıqlarǵa saldıń yúzmıń ármanıy,
Kórip kimsa yaxshıy, kimsa yamanıy,
Bir yaqshıǵa bashın qostıń, Madawar.

Ishqı ǵálib bolıp, tappay paraxat,
Bir, ekkigá nápsiń qılmay qanaat,
Ashıqlar kóńlini áylep jaraxat,
Ol yaqshıdan ayra túshtiń, Madawar.

Kórdiń birneshe kún ıshqıń mehnatin,
Shektiń ayralıqtıń yane záhmátin,
Aqır tatıp ashıqlıqtıń lázzetin,
Atadan, anadan keshtiń, Madawar.

Qız ózin giznámak lazımdur bilsáń,
Biyǵayat, ayib yerir, biypárwa yúrsáń,
Bnr yigitniń atın, jónin jay kórseń,
Áliń bılǵap, qushaq ashtıń, Madawar.

Besh kún bul dúnyada oynap-kúlám dep,
Áyshi-áshirat, zawqı-sapa súrám dep,
Kóńlúm súygán yigit bilán yúrám dep,
Uyattan, abıroydan keshtiń, Madawar.

Kóńlińe alǵan ishtin bárshásin etip,
Uyat, izzet, abıroyını tárk etip,
Kóńlińni sen gúná ishke berkitip,
Harammedi etti pushtıń, Madawar?

Madawar qız erte turıp gúńirendi,
Yash bashıdan gúná ishni úgrandi,
Kimni kórse boyın qushıp imirandi,
Ishq otına kúyip-pishtiń, Madawar.

Tawsıpıńdı ayta bersem túkánmas,
Táriypińni shunsha yazsam keshalmas,
Yaranlar, men boldım, imdi yúrir bas,
Buw sóz birlá taptım pushtın, Madawar.