Көрген соң тынарма Күнхожа сөзи,
Йығлар бул азаптан адамның өзи,
Балалардың ана деп бул айтқан сөзи,
Бул сөзиме қулағың сал, яранлар.

Жылап-жылап шырақларым өшеди,
Бул истиң тәғдирин кимлер шешеди,
Йығлай-йығлай сорлы күни кешеди,
Не қыларман енди буған, яранлар.

Зар жылап отыр ғой үйимниң иши,
Мениң жайым жер төлениң мүйеши,
Еки ул бар аға өзимнен киши,
Не қыламан енди буны ағалар.

Жылайды бийшара анасын айтып,
Дәрт үстине және дәртти молайтып,
Жүрермен дүньяда ағалар айтып,
Бир басқа бир саўда түсти, яранлар.

Бул басым берк екен, жарылған емес,
Залымлардың күни тарылған емес,
Бизлерден душпанлар сарылған емес,
Душпанларға бахыт берди, яранлар.

Бул дүнья өтерсең, ақырың паны,
Алдадың қыядан жол салып, мени,
Саў болса адамның ағалар дени,
Бир басқа бир саўда болды, яранлар.

Жетимлер телмирип жерди қазарлар,
Мениң бүлгенимди кимлер жазарлар,
Мөҳмин қулға бермес едим азарлар,
Бир басқа бир саўда болды, яранлар.

Бул дүньяның опасы жоқ бийпаян,
Ол өзиңе сениң әўелден аян,
Илая душпанлар етпегей зыян,
Болмаса ҳал қыйын болды, яранлар.

Бул заман тарылды ўақтым өт енди,
Не қылайын айтып енди бөтенди,
Мен сорлы зар жылап, ҳайран етеди,
Бир басқа бир заман болды, яранлар.

Теңизде аў салсаң, ҳәргиз балық жоқ,
Диземде димарым, белде ҳалым жоқ,
Мен сорлыға, ғәриплерге жарық жоқ,
Қараңғы думанда қалдым, яранлар.

Заман тарылып тур, аспан тутылып,
Таба алмадым жолды бәрҳа умтылып,
Залым себебинен әрманда болып,
Бир басқа бир саўда болды, яранлар.

Бул заман тарылды, кейни болмады,
Залымлардың қызыл гүли солмады,
Кеўилимниң ўақыты хош болмады,
Басқа ақырзаман түсти, яранлар.

Байға жүрсе жарлы ҳақын алалмай,
Ойнап соннан жаслар шалқып жүре алмай,
Бир кеткенлер ел дийдарын көре алмай,
Бир басқа бир заман болды, яранлар.

Яранлар сөз тыңлап қулақ салмаға,
Қаст еткен душпанның ақлын алмаға,
Шын жәннетке досың менен бармаға,
Қолың былға, жолды силте, яранлар.

Тыңлап мениң пидә арзы-ҳалымды,
Өзиң жеткергейсең ырысқалымды,
Қыйнап залым мениң шыбын жанымды,
Ата-анамды жерлер қушты, яранлар.

Ўа, дариқа, бул дүньяда қызық жоқ,
Ғәриплерде әзизлик бар, бузық жоқ,
Бәйгиден өтерге белли сызық жоқ,
Аламат, баламат болды, яранлар.

Соның ушын бул дүньяда йығларман,
Азап билен қана бағрым дағларман,
Қашан ўақтым, бахтым келип шағларман,
Адамның руўҳы гәда, яранлар.

Бул заман тарылды, тартылды танап,
Өмиримниң азабын болмаспан санап,
Жүрмедим ағалар бир майдан шағлап,
Бул дүнья ақырет болды, яранлар.

Душпанға сырыңны қылмағыл аян,
Узақ өмириңе етерлер зыян,
Шағып денелерин уўлы ҳәм жылан,
Биразлардың өмири өтти, яранлар.

Айра түстим туўып өскен елимнен
Қартайдым, дәрманым кетти белимнен,
Йырақ болып турғаным жоқ елимнен,
Бир басқа бир саўда болды, яранлар.

Kórgen soń tınarma Kúnxoja sózi,
Yıǵlar bul azaptan adamnıń ózi,
Balalardıń ana dep bul aytqan sózi,
Bul sózime qulaǵıń sal, yaranlar.

Jılap-jılap shıraqlarım óshedi,
Bul istiń táǵdirin kimler sheshedi,
Yıǵlay-yıǵlay sorlı kúni keshedi,
Ne qılarman endi buǵan, yaranlar.

Zar jılap otır ǵoy úyimniń ishi,
Meniń jayım jer tóleniń múyeshi,
Eki ul bar aǵa ózimnen kishi,
Ne qılaman endi bunı aǵalar.

Jılaydı biyshara anasın aytıp,
Dárt ústine jáne dártti molaytıp,
Júrermen dúnyada aǵalar aytıp,
Bir basqa bir sawda tústi, yaranlar.

Bul basım berk eken, jarılǵan emes,
Zalımlardıń kúni tarılǵan emes,
Bizlerden dushpanlar sarılǵan emes,
Dushpanlarǵa baxıt berdi, yaranlar.

Bul dúnya óterseń, aqırıń panı,
Aldadıń qıyadan jol salıp, meni,
Saw bolsa adamnıń aǵalar deni,
Bir basqa bir sawda boldı, yaranlar.

Jetimler telmirip jerdi qazarlar,
Meniń búlgenimdi kimler jazarlar,
Móhmin qulǵa bermes edim azarlar,
Bir basqa bir sawda boldı, yaranlar.

Bul dúnyanıń opası joq biypayan,
Ol ózińe seniń áwelden ayan,
Ílaya dushpanlar etpegey zıyan,
Bolmasa hal qıyın boldı, yaranlar.

Bul zaman tarıldı waqtım ót endi,
Ne qılayın aytıp endi bótendi,
Men sorlı zar jılap, hayran etedi,
Bir basqa bir zaman boldı, yaranlar.

Teńizde aw salsań, hárgiz balıq joq,
Dizemde dimarım, belde halım joq,
Men sorlıǵa, ǵáriplerge jarıq joq,
Qarańǵı dumanda qaldım, yaranlar.

Zaman tarılıp tur, aspan tutılıp,
Taba almadım joldı bárha umtılıp,
Zalım sebebinen ármanda bolıp,
Bir basqa bir sawda boldı, yaranlar.

Bul zaman tarıldı, keyni bolmadı,
Zalımlardıń qızıl gúli solmadı,
Kewilimniń waqıtı xosh bolmadı,
Basqa aqırzaman tústi, yaranlar.

Bayǵa júrse jarlı haqın alalmay,
Oynap sonnan jaslar shalqıp júre almay,
Bir ketkenler el diydarın kóre almay,
Bir basqa bir zaman boldı, yaranlar.

Yaranlar sóz tıńlap qulaq salmaǵa,
Qast etken dushpannıń aqlın almaǵa,
Shın jánnetke dosıń menen barmaǵa,
Qolıń bılǵa, joldı silte, yaranlar.

Tıńlap meniń pidá arzı-halımdı,
Óziń jetkergeyseń ırısqalımdı,
Qıynap zalım meniń shıbın janımdı,
Ata-anamdı jerler qushtı, yaranlar.

Wa, dariqa, bul dúnyada qızıq joq,
Ǵáriplerde ázizlik bar, buzıq joq,
Báygiden óterge belli sızıq joq,
Alamat, balamat boldı, yaranlar.

Sonıń ushın bul dúnyada yıǵlarman,
Azap bilen qana baǵrım daǵlarman,
Qashan waqtım, baxtım kelip shaǵlarman,
Adamnıń ruwhı gáda, yaranlar.

Bul zaman tarıldı, tartıldı tanap,
Ómirimniń azabın bolmaspan sanap,
Júrmedim aǵalar bir maydan shaǵlap,
Bul dúnya aqıret boldı, yaranlar.

Dushpanǵa sırıńnı qılmaǵıl ayan,
Uzaq ómirińe eterler zıyan,
Shaǵıp denelerin uwlı hám jılan,
Birazlardıń ómiri ótti, yaranlar.

Ayra tústim tuwıp ósken elimnen
Qartaydım, dármanım ketti belimnen,
Yıraq bolıp turǵanım joq elimnen,
Bir basqa bir sawda boldı, yaranlar.