Полат орағы қолында,
Жүрген талаптың жолында,
Атыздың оңлы, солында,
Жүрген күн-түн орақшылар.

Ийнинде күнлик шапаны,
Пақалға тырналып саны,
Бәрқулла қыйналып жаны,
Атызда жүр орақшылар.

Беллери төмен бүгилип,
Оннан да бетер ийилип,
Көзинен жасы төгилип,
Зар жылап жүр орақшылар.

Туўған жерлерин сағынып,
Қайғыдан ҳәйкел тағынып,
Ҳал сорасқанға шағынып,
Қайғыда жүр орақшылар.

Өскен жерине жете алмай,
Жумысты тасдап кете алмай,
Асқар қумлардан өте алмай,
Қайғыда жүр орақшылар.

Тапқаны жетпей тыйынға,
Иси айналып қыйынға,
Келе алмай тойға, жыйынға,
Зар жылап жүр орақшылар.

Орақшылар ойланады,
Тәнде жаны қыйналады,
Жипсиз киби байланады,
Ҳақы аздур мийнети көп.

Не қылсын олар қыйланбай?
Жумыс ислейди бир тынбай,
Аўыл-елине қайта алмай,
Жүрген мынаў орақшылар.

Қарасақ жүзлери сары,
Орғанлары пискен тары,
Бул ислерге келип ары,
Жүрген мынаў орақшылар.

Аўылға аман қайтқайсыз,
Балаларыңды қуўантқайсыз,
Душпанларды муңайтқайсыз,
Хош аман бол, орақшылар.

Polat oraǵı qolında,
Júrgen talaptıń jolında,
Atızdıń ońlı, solında,
Júrgen kún-tún oraqshılar.

Íyninde kúnlik shapanı,
Paqalǵa tırnalıp sanı,
Bárqulla qıynalıp janı,
Atızda júr oraqshılar.

Belleri tómen búgilip,
Onnan da beter iyilip,
Kózinen jası tógilip,
Zar jılap júr oraqshılar.

Tuwǵan jerlerin saǵınıp,
Qayǵıdan háykel taǵınıp,
Hal sorasqanǵa shaǵınıp,
Qayǵıda júr oraqshılar.

Ósken jerine jete almay,
Jumıstı tasdap kete almay,
Asqar qumlardan óte almay,
Qayǵıda júr oraqshılar.

Tapqanı jetpey tıyınǵa,
Ísi aynalıp qıyınǵa,
Kele almay toyǵa, jıyınǵa,
Zar jılap júr oraqshılar.

Oraqshılar oylanadı,
Tánde janı qıynaladı,
Jipsiz kibi baylanadı,
Haqı azdur miyneti kóp.

Ne qılsın olar qıylanbay?
Jumıs isleydi bir tınbay,
Awıl-eline qayta almay,
Júrgen mınaw oraqshılar.

Qarasaq júzleri sarı,
Orǵanları pisken tarı,
Bul islerge kelip arı,
Júrgen mınaw oraqshılar.

Awılǵa aman qaytqaysız,
Balalarıńdı quwantqaysız,
Dushpanlardı muńaytqaysız,
Xosh aman bol, oraqshılar.